– In mun doddjo nu álkit
Guovdageaidnulaš Esaias Sokki gilvalii skohtergilvvuin mannan vahkoloahpa Kauhajokis. Nuppi beaivvi manai funet go lei gilvaleamen vuosttaš saji badjel.
Mannan vahkkoloahpa ledje Snowcross Super League gilvvut Kauhajokis, Suomas. Das gilvalii guovdageaidnulaš Esaias Sokki.
Esaias ii lean duhtavaš vuosttaš gilvobeivviin. Son bođii oppalaččat čihččet sadjái, muhto vurddii ođđa ja buoret vejolašvuođaid beaivvi maŋŋel.
Nuppi gilvobeaivvi manai funet Esaias Sokkiin. Nuppi vuoru de lei Esaias Sokki ovddemusaid gaskkas ja gilvalii vuosttaš saji nalde, muhto de njuikii eará gilvaleaddji, Dennis Kangasmaa, su ala.
– Diekko lei buorre luodda bearjadaga, ja de jurddašin lávvordaga ahte mun geahččalan vuot dan. De ledje rievdadan bána ja ožžon eambbo fártta, ja bođii nubbi olmmái beare fárttain, dadjá Esaias.
Buohcceviesus
Esaias bávččagii, ja sihke giehta ja juolgi ledje bávččagan, dieđihuvvui Team Sokki #153 Facebook-siiddus maŋŋel gilvvu. Moadde diimmu maŋŋel dieđihuvvui seamma siiddus ahte buohcceviesus duođaštedje ahte ii leat mihkkege doddjon.
– In jáhke dat boahtá váikkuhit movt ge. Mun gal lean fas dearvvaš. Dat attii eambbo motivašuvnna, in mun doddjo nu álkit, muitala Esaias lihkohisvuođa birra.
Ođđa gilvui
Beaivvi maŋŋel røntgena Suomas lei Esaias vel røntgenis Álttás, dalle duođaštedje ahte ii mihkkege lean doddjon.
Esaias Sokki eadni, Hanne Mari Taarneby Kuhmunen muitala ahte dan botta go lei boahtime røntgenis de dieđihii ođđa gilvui beassášlávvordaga, ja soaitá searvat dasa, jos skohtera oažžu ortnegii dan rádjai.
– Ii dat bissehan su. Livččen sávvat ahte lea veaháš várrogas, vaikko in háliit ahte galgá ballat, muhto jurddašit iežas dearvvašvuođa birra, dadjá Esaiasa eadni.
Čuovvu buot gilvvuid
Esaias Sokki eadni, Hanne Mari
Taarneby Kuhmunen, láve čuovvut buot gilvvuid. Mannan vahkoloahpa lei spábbačiekčangilvvuin eará mánáin, muhto čuovui oktanaga Esaiasa njuolggosáddaga, ja oinnii lihkohisvuođa.
– Lei áibbas issoras. Mun heađásmuvven, in ge diehtán mo manai ja mii dáhpáhuvvá, in ge sáhttán leat lahka, dadjá son.
Son muitala ahte beasai suinna háleštit dan botta go lei ambulánssas ja gulai ahte dan rádjai manai bures. Liikká de iskkai girdibileahtaid dohko, muhto vuosttaš girdi ii seivon ovdal maŋŋebárgga, ja dát geavai lávvordaga, nu ahte ii beassan mannat iežas máná lusa.
Kuhmunen muitala ahte lea hárjehallamis ovdal bávččagahttán, ja leat jorran olu buohcceviesuin ja heahtedoaktára luhtte.
Kvalifiseren
Sokki lea maid kvalifiseren sihke Em-gilvvuide mat leat Juensuus Suomas ja Girkonjárggas, ja Super League gilvvuide Nuortariikkas. Sus lei mihttu beassat vuodjit finála Nuortariikkas.
– Mun bessen justa dohko, dat lei maŋimuš kvalifiserensadji. Dat gal lei lihkku, dadjá son.