Sámi musihkka lea dávvirgiisá
– Olmmoš sáhttá gulahallat musihkain vaikko gos máilmmis, dadjá Johan Sara jr. Ávvirii. Son lea ovdanbuktán sámi musihka miehtá máilmmi.
Dán vahkkoloahpa ovdanbuvttii son erenoamáš musikálalaš dahkosa guldaleddjiide sávnnjis. Sonic Sauna lea musihkkainstallašuvdna. Dat dáhpáhuvvá Borealis elektronikafestiválas Bergenis.
– Bures boahtin dutnje, dadjá Johan Sara jr. ja rahpá uvssa sávdnjái, mii lea Nordnesas vuotnagáttis gávpotguovddážis. Siste moai nuoladetne ja bohte measta áibbas dievva sávdnjái gos lea láse vuona guvlui. Guovtti skájanis čudjet Finnmárkku meara jienat. Guldaleaddjit guldalit jurdagiid siste daid miellagiddevaš jietnadahkosa; sihke áirruid stuhčama ja mearralottiid ja fálláid lávluma mat leat báddejuvvon.
Áigeguovdil ođđa skearruin
Dakka ovdalaš lean beassan humadit dainna mearrasámi musihkkáriin gii lea Álttás eret, muhto orru Mázes.
– Lean aitto almmuhan CD «Gávcci jahkodaga». Dat lea gámmirmusihkka davviguovllu gávcci jahkeáigodaga birra, mii lea komponerejuvvon streaŋgakvartehttii ja piánoi, muitala Johan Sara jr.
Maŋemus go sámi komponista almmuhii skearru klassihkalaš musihkain, lei John Person 2003:s. – Dál šaddá bargu ges geahččalit ráhkadit scenalaš veršuvnna orkeastariin muhtomin boahtteáiggis, muhto dat ii šatta gal dál vuos.
Sámi musihkka miehtá máilmmi
Buot su musihkka lea rávdnjenbálvalusain nu go Spotify, itunes ja Tidel.
– Juohke mánu čájeha distributevra Musikkoperatørene oppalaččat gos musihkka čuojahuvvo ja man olu guldaleaddjit leat guldalan ja makkár riikkain dat leat. Rávdnjen lea dahkan musihka hui álkit olámuddui miehtá máilmmis. Juohke almmuhusas lea sierra historjá. Lean earret eará almmuhan trilogiija konseaptaskearru. Transmission, mii muitala luođi ruohttasiid ohcama historjjá, muitala son.
Mázelaš ja áltálaš lea čuojahan konsearttaid sámi musihkkáriiguin miehtá máilmmi, son árvvoštallá 50-60 riikkas. Japána gal bázii muitui.
– Japánas leat hui erenoamáš geahččit. Ovdanbuktima vuolde čohkkájit japána geahččit ja guldaleaddjit áibbas jaska ja guldalit. Sii eai speaččo gieđaid bihtáid gaskka, muhto go konsearta nohka de bávkkeha latnja giehtaspeažžumiin.
Logaldallan Phdstudeanttaide
Borealisis son maid logaldalai sámi musihka komposišuvnna birra mas lea luohti vuolggasadjin doavttergrádastudeanttaide dan árvvusadnojuvvon Griegakademiijas Bergenis.
– Sii jerre earret eará maid olbmot dasa lohket go mun eksperimenteren luđiin. Mun muitalin ahte olbmot sihke rámpojit ja cuiggodit go eksperimenteren árbevirolaš luđiin. Nuorra olbmot leat várra rahpaseabbo go boarráset olbmot geat eai liiko go rievdada luođi. Galggašeimmet atnit muittus ahte sámi musihkka rievttimielde lea oalle ođas, ja vuosttaš báddemat ledje easkka 1970-logus. Sámi musihkka gal liikká ovdána, ja dat lea dego dávvirgiisá. Mađi eanet dan burgá, dađi eanet gávdná, dadjá Sara jr.