Searvvaiga ON eamiálbmogiid bissovaš forumii
Sámedikki nuoraidráđi ságadoalli Rosa-máren Juuso ja várreságadoalli Helmi Ljetoff oassálasttiiga ON eamiálbmogiid bissovaš forumis (UNPFII) New Yorkas.
Foruma 23. čoahkkima fáddán lei eamiálbmogiid iešmearridanvuoigatvuođa nannen ON eamiálbmogiid vuoigatvuođaid guoski julggaštusa oktavuođas: eamiálbmogiid nuoraid jiena deattuheapmi.
Bissovaš foruma čoahkkimii oassálastin gullá nuoraidráđi doaibmaplánii čálihuvvon doaimmaide.
Nuoraidráđđi doalai cuoŋománu 16. beaivvi sáhkavuoru, mas ságadoalli Rosa-máren Juuso ovdanbuvttii duhtameahttunvuođa sámediggeválggaid ođđasit lágideapmái ja ARH mearrádussii das ahte eai atte sidjiide guhte leat deavdán 18-jagi ovddit válggaid rájes vejolašvuođa ohcat válgalogahallamii.
– Dan lassin go mii dovdat, ahte mii leat olgguštuvvon ja badjelgehččon, de ballat mii maid Sámedikki boahttevuođas. Mu mielas lea issoras smiehttat, mo mii gártat gillát olggobeale olbmuid mearrádusaid geažil min giela ja kultuvrra seailluheami várás, dadjá nuoraidráđi ságadoalli Rosa-máren Juuso preassadieđáhusas.
Nuorat masset luohttámuša demokratiijai
– Go foruma fáddán lea iešmearridanvuoigatvuođa nannen ja erenoamážit nuoraid jiena lokten ságastallamii, lea váivi, ahte Suomas dahkkojuvvojit mearrádusat mat vuostálastet daid fáttáid. Easkka 18 jagi deavdán sámenuorat eai beasa jienastit ođđasit ordnejuvvon válggain. Dat heajuda nuoraid jáhku demokráhtalaš vuogádahkii, eatge mii dieđe makkár váikkuhusat das leat ovdamearkka dihte jienastanaktiivvalašvuhtii. Lassin nuorat leat váiban dáistalit Suoma láhkaásahemiin, mii lea bistán guhká. Sámediggelága ođasmahttin lea dieđusge olmmošvuoigatvuođa ášši, muhto seammás dat attášii min vuodjut nuoraid áššiide ja buresveadjimii, dadjá nuoraidráđi várreságadoalli Helmi Ljetoff preassadieđáhusas.
Bissovaš foruma bargun lea loktet ságastallamii eamiálbmogiidda guoskevaš gažaldagaid erenoamážit ekonomalaš ja sosiálalaš ovdáneami, kultuvrra, birasgažaldagaid, skuvlejumi, dearvvašvuođa ja olmmošvuoigatvuođaid suorggis.
Bissovaš forum addá ávžžuhusaid ja doaibmá guovddáš forumin stáhtaid, eamiálbmogiid ja ON sierraorganisašuvnnaid gaskasaš ságastallamii. Forum čoahkkana oktii jagis ON váldoguovddážis, New Yorkas.