Ávvudišgohtet go gerget 13 jagi skuvlavázzimiin
Dál álgá russaáigi. – Dego Amerihkás lávejit gohčodit «graduation».
Dán vahkkoloahpa álgá russaáigi miehtá Norgga. Dat bistá birrasii mánu, miessemánu 17. beaivvi rádjái. Lagamus boahtte áiggi leat dan oktavuođas oaidnimis nuorat iešguđetlágan ivnnat biktasiiguin miehtá riikka.
Earret eará Guovdageainnus leat russat gergosat ja gealdagasas.
Ávvudit go gerget 13 jagi skuvlavázzimiin
Ayla Nutti ja Lajla Katrine Triumf leaba ruksesrussat ja illudeaba ávvudit go geargaba 13 jagi skuvlavázzimiin.
– Mii ávvudit ahte mii dál leat geargan 13 jagi skuvllain. Dego Amerihkás lávejit gohčodit «graduation», dadjá Lajla Katrine.
– Mii geat leat vázzán studerengelbbolašvuođalasáhusa, mis lea leamaš liige olu ja šaddá nu jalla buorre geargat. Oažžu áinnas ávvudit vaikko guokte mánu mu bealis, boagusta Ayla.
– Mii šaddá buot suohttaseamos
russaáiggiin?
– Mu mielas šaddá somá mannat deaivvademiide mu olbmáiguin. Ii leat eará oktii eallimis russa ja beassá vánddardit diekkár deaivvademiin, nu ahte mun jáhkán dat šaddá hui somá, vástida Lajla Katrine.
Ayla lohká iežas árvideames fárreme go joatkkaskuvlla gárve ja danne šaddá russaáigi ovttaládje loahpaheapmi iežas luohkáin.
– Mun jáhkán mun illudan beare ovttastallat singuin geat leat mu joavkkus, go mun gal de sihkkarit fárren eret dáppe Guovdageainnus. Dat šaddá dego dakkár loahpaheapmi, veahá váivi dieđusge, boagusta Ayla.
Russadeaivvadeamit feara gos
Guovdageainnu russat eai leat plánen Guovdageainnus čohkkát olles russaáiggi. Sii áigot finadit russadeaivvademiin, ja soitet vel ránnjásuohkaniin ge.
– Muhtumat meinejit vuolgit russadeaivvadeapmái Stavangerii ja mun jáhkán mii buohkat meinet Tromsøtreffai mii lea vahkko
loahpa maŋŋel. Guovdageainnu ja Kárášjoga russain láve juohke jagi dakkár «kampen om vidda» -spábbačiekčan maid. Sihkkarit fitnat Álttás ja gos dál ain heive, muitala Lajla Katrine.
Russaáigi deaivá oktanis eksámenáiggiin oallugiidda, nu ahte buohkat eai diehttelasat sáhte searvat juohke diŋgii.
– Mis lea hui olu skuvla, máŋggas leat váldime studerengelbbolašvuođalasáhusa nu ahte ferte dieđusge veahá heivehit, dadjá Ayla.
Russaáigi ja eksámenáigi seammás
Giđabeallái lea sihke russaáigi ja eksámenáigi. Ráhkkaneapmi eksámenii, ja máŋgasis leat olu eksámenat oanehis áiggis.
Dan ektui jurddašeaba russaguovttos ahte juohkehaš ferte dahkat dan mii alcces orro buoremus.
– Lea veahá váttis plánet danne go leat sierralágan plánat, daid ii sáhte álo heivehit nu ahte buohkaide heive álo. Muhtomin ferte olmmoš ieš mearridit maid dahká, dadjá Ayla.
– Gal mii dan oaidnit mo šaddá, mii eat gille nu olu jurddašit dan birra, mojohallá Lajla Katrine.
– Juohkehaš ferte ieš mearridit maid vuoruha, lasiha vel.
Dehálaš fuolahit nubbi nuppi
Go russain leat plánat finadit russadeaivvademiin eará báikkiin, de leat juo ovdagihtii jurddašan mo galget doppe fuolahit nubbi nuppi.
– Mii leat goit jurddašan ahte eat ábut goasse diktit ovttage mannat okto, stuora gávpogiin gos olu olbmot, ii dan goit dieđe. Dieđusge maid váruhit nubbi nuppi, ja váldit ovdagihtiinjuolggadusaid, dadjá Lajla Katrine.
– Váruhit maid nuppiid juhkosiid, lasiha Ayla.