– Historjjálaš
Sámi filbma gehččon 7,1 miljovnna geardde ovtta vahkkus:
Lea vássán vahkku dan rájes go vuosttaš sámi Netflix-filmma «Suoládeapmi» lei vejolaš geahččat, ja loguid mielde lea šaddan historjjálaš sámi filbman gehččiidloguid dáfus.
Bearjadaga cuoŋománu 12. beaivvi ilmmai filbma «Suoládeapmi» rávdnjenbálvalussii, miehtá máilmmi.
Čáledettiin lea filbma nuppi sajis máilmmeviidosaš logi eanemus gehččon listtus filmmain mas ii leat váldogiella eaŋgalasgiella. Dat lea ge gehččon birrasii 7,1 miljovnna geardde, ovtta vahkkus.
Internašunála sámi filbmainstituhta (ISFI) direktevrra Anne Lajla Utsi mielas lea jáhkkemeahttun oaidnit man bures filbma lea dahkan Netflixas.
– «Stolen» lea historjjálaš sámi filbma gehččiidloguid dáfus, inge jáhke gal ovdal nu viidát olahan gehččiid ovttage sámi filmma ovdal. Jurddaš, 7,1 miljovnna olbmo leat geahččan dan! Lea duođaid áibbas jáhkkemeahttun ja hui somá go «Stolen» šattai dákkár sukseassan, lohká Utsi.
Anne Lajla Utsi čilge ahte Netflix bođii sidjiide ideain filbmii ja háliidedje ovttasbarggu.
– ISFI lea maid ovttasbargan Netflixain gelbbolašvuođadoaimmain, Netflix writers Academy sámi čálliide ja buvttadeddjiid kursa. Dat mii lea hui somá lea ahte mii joatkit ovttasbarggu Netflixain dál, dadjá Utsi.
Stuora beroštupmi
Kolibri Productions filbmabuvttadeaddji Khalil Al Harbiti sávvá ahte filbma olaha olu gehččiide, ja jáhkká ahte historjá sáhttá čuohcat olusiidda miehtá máilmmi.
– Mun ádden ahte lea hirbmat beroštupmi dakkár filmmaide dál. Lea hui somá go nu ollugat leat oaidnán ja háliidit geahččat dan. Fáddá Sámi birra lea ain báhkas ja áigeguovdil, dadjá son NRK:I.
Eai ádden man viidát sáhttá olahit
ISFI direktevrra Anne Lajla Utsi mielas čájeha dát ahte máilmmi geahččit háliidit oaidnit sámi filmmaid, mii maid mearkkaša ahte fertejit ráhkadit ain eambbo sámi guhkesfilmmaid. Son lohká leat dehálažžan ahte Sámi servodat beassá filmma bokte čalmmustahttit sápmelaččaid hástalusaid miehtá máilmmi.
– In jáhke riekta mii ipmirdeimmet go álggaheimmet ovttasbarggu Netflixain man viidát filbma sáhttá johtit ja ahte šaddá dakkár sukseassan. Muhto mii diđiimet ahte mis leat čeahpes filbmadahkkit geat ráhkadit buori filmma, nu go Elle Márjá Eira ja olles filbmenjoavku, muitala Utsi.
Son namuha ahte lea filbmadahkkiid ja olles joavkku čehppodat ja jálluvuohta mii lea dahkan dan vejolažžan.
– Jáhkán maid go lea vuosttaš geardde go Netflix lea ráhkadan guhkesfilmma sámiid muitalusa vuođul, de dát lea maid juoga mii geasuha máilmmi gehččiid go eai leat oaidnán dan ovdal, dadjá son.