Čogge badjel 30
Juohke oahppi Guovdageainnu skuvlla 4B luohkás čohkkii sullii 19 kg batteriijaid.
Guovdageainnu skuvlla 4B klássa lea leamaš mielde Batterjakten gilvvus man Miljøagentene leat lágidan ovttas Varta, Clas Ohlson ja Batteriretur njukčamánus. Batteriijagilvu lea gilvu masa 4. klássa oahppit olles Norggas besset searvat, sii galget oahppat movt batteriijaid gieđahallat ja gosa galgá adnon batteriijaid doalvut. Gilvvus galge oahppit čoaggit nu olu batteriijaid go nagodit njukčamánu 4. beaivvi rájes njukčamánu 24. beaivvi rádjái.
Lei ođđajagemánus go 4B klássa gulahallanoahpaheaddji, Berit Ellen Skum, muitalii klássii gilvvu birra. Oahppit mearridedje dakkaviđe ahte dasa gal áigot searvat.
De álgege 4B oahppit ráhkkanit gilvui ja čoaggigoahtit batteriijaid.
Veahá gilvvu birra
Go searvá Batteriijagilvui, de juohke oahppi oažžu ageantamearkka ja šaddá de birasageantan. Birasageanta lea dakkár gii lea oahppan movt galgá ruskkaid sirret ja movt mii galgat váldit vára luonddus. Oahppit galget oahppat batteriijaid gieđahallat, birasgáhttema ja fuomášit man dehálaš lea váldit vára min čáppa luonddus. Dan doaimma oktavuođas leat buohkat oahppan ahte mii fertet hui várrogasat gieđahallat batteriijaid dan sivas go batteriijat sáhttet buollát jus geažit guoskkadit oktii. Danne lea nu ahte ferte teipet gežiid eastadan dihte buollima doppe gosa batteriijat leat vurkejuvvon.
Vahkkodoaimmat
Juohke vahkku lei ohppiin bargu maid batterigilvu almmuhii sin neahttasiiddus. Doaimmaid oktavuođas leat filmmat maid sáhttá geahččat, bargobihtát, logaldallamat ja maid quizza. Mii čađaheimmet juohke vahkku doaimmaid ja ráhkadeimmet gova batteriijaiguin.
– Maŋemus vahkku lei bargun ráhkadit dakkár buktaga mii galgá čájehit maid mánát gáibidit. Buktagis
galggai boahtit ovdan movt mii háliidit ahte min máilbmi galgá leat boahtteáiggis. Oahppit galge ovddidit ovtta birasgáibádusa, birassávaldaga ja maid ovtta ruoná čurvestaga. Dan sáhtte ovddidit gova, dáidaga dahje divtta bokte.
Oahppit ráhkadedje guokte gova maid sii málejedje ja čálle movt sii háliidit mii galgat váldit vára birrasis. Min buvtta lei nu fiinnis ja buorre, ahte sii ledje okta dain golmma klássain geat vuite maŋemus vahkku gilvvu.
Mii vuittiimet 3000 ruvnno klássii, muitalit oahpaheaddji ja oahppit.
Somás doaibma
Oahppit muitalit ahte dán gilvvu oktavuođas lea sis leamaš olu bargu, sii leat earret eará vahkkoloahpaid ja maŋŋelgaskabeivviid guossastállan oahppásiid luhtte čoaggin dihte batteriijaid:
– Áhkut, ádját, oappát, vieljat ja olu eará fuolkkit leat veahkkin čoaggán batteriijaid. Váhnemat leat hui mielas searvan doibmii ja viššalit vuojáhallan ohppiid ja fievrredan batteriijaid.
Oahppit leat hui duhtavaččat go lea mannan nu bures dáinna doaimmain ja muitalit ahte leat oahppan hui olu go leat ieža ferten čoaggit batteriijaid ja eanet jurddašit ruskkasirrema birra.
Loahpas gilvvu ledje 4B klássa čoaggán 323 kg, juohke oahppi lei gaskamearálaččat čoaggán 19 kg batteriijaid.
Vuoitu
Olles Norggas ledje golbma 4. klássa mat vuite 15 000 ruvnno.
– Min klássa lei maid mielde vuorbádeamis, muhto eat vuoitán dán háve nu olu. Lei goitge hui somá go vuittiimet 3000 ruvnno, go de mii beassat fuobmát juogalágan somás doaimma ovdal geasseluomu. Mii áigut giitit buohkaid geat leat buktán midjiide batteriijaid, go din haga eat livčče vuoitán gilvvu.
Čállán: Guovdageainnu mánáidskuvlla 4B luohká oahppit ja oahpaheaddji Berit Ellen A. Skum.