Eambbosat oamástit kryptovaluta
Diibmá dieđihedje 1597 olbmo Romssas ja Finnmárkkus ahte sis lea kryptovaluhta. Jagi ovdal lei 1415 olbmos dat. Vearroetáhtas jáhkket seammás ahte ollugat eai dieđe ahte dan ferte čállit vearrodieđáhussii.
– Mii diehtit ahte leat eambbosat geain rievtti mielde lea kryptovaluhta Romssas ja Finnmárkkus. Muitte don galggat ieš dieđihit dieđuid kryptovahluta birra vearrodieđáhussii, dadjá Vearroetáhta direktevra Nina Schanke Funnemark preassadieđáhusa bokte.
Riikka dásis leat 48 000 olbmo muitalan 2022:s ahte sis leat virtuála oamastusat. Dat leat golbma duháha olbmo eanet go 2021:s. 2020:s ledje dušše 15 000 olbmo geain lei kryptovaluhta.
– Áiggi mielde mii oaidnit issoras lassáneami sis geat dieđihit ahte oamastit kryptovaluhta, muitala Funnemark.
Leat moadde fáktora mat leat dagahan ahte eambbosat leat dieđihan kryptovaluhta vearrodieđáhussii 2020 rájes. Dat lea fokus dasa ahte kryptovaluhtas ferte máksojuvvot vearru ja maiddái go kryptovaluhtas leat garra kursarievdadusat.
Čahppes logut, čihkkojuvvon logut leat ain stuorrát. Vearroetáhtta rehkenastá ahte dušše 15 proseanrta sis geat oamastit kryptovahluta muitalit dan birra vearrodieđáhusas.
Eai leat sierra njuolggadusaid kryptovaluhta váste, muhto dat lea opmodatobjeakta. Vearroetáhtas čilgejit ahte jus olmmoš vuovdá kryptovaluhta vuoittuin, de ferte das máksojuvvot vearru. Jus vuovdá dan massimiin, de dan sáhttá bidjat geasusin. Olmmoš maid galgá dieđihit vearrodieđáhussii go oamasta krypto.
– Visot kryptovaluhta gávppašeapmi galgá čállot vearrodieđáhussii, beroškeahttá man stuorra árvu das lea, lohká vearrodirektevra.
Vearroceahkki vuoittus lea 22 proseantta.
Vearroetáhtas muittuhit ahte olmmoš sáhttá rievdadit golmma maŋimuš jagi ovddas vearrodieđáhusaid. Cuoŋománu 30. beaivvi lea áigemearri rievdadit dieđáhusa 2020 ovddas.