– Mihttu lea vuoitit
Klemet Turi lea badjelaš 60 jagi vuodjan ja searvan iešguđet vuodjangilvvuide, dán vahkkoloahpa áigu gilvalit NM Masters-vuodjamis.
Cuoŋománu 26. beaivvi álget Norggameašttirgilvvut (NM) Masters-vuodjamis Áhkanjárggas. Ovcci searvvi Davvi-norggas oassálastet gilvvuin, kárášjohkalaš Klemet Turi (74) lea okta sis guđet leat gergosat gilvalit. Son lea odne dollen Áhkanjárgii, ja illuda gilvalit ja deaivvadit oahppásiiguin.
– Mun lean gilvalan badjel 60 jagi. In dieđe mii lea somá, muhto lea somá bissut dearvvašin. Mihttu lea vuoitit, in vuolggáše gilvalit jus ii livčče mihttu vuoitit, lohká son.
Rámida vuodjanbirrasa
Klemet Turi muitala son lea maŋemuš 30 jagi searvan NM Masters-vuodjamii.
– Leat eanaš dat seammahat olbmot mat servet, bohtet muhtun ođđa gilvaleaddjit, muhto jávket eambbo ahte eambbo gilvaleaddjit. Dasa lea lunddolaš vástádus ahte olbmot jápmet, čaimmiha son. Turi muitala vuodjanbiras lea buorre ja dovdá sin measta bearašin.
Galgá leat somá, ii hušša hájehallamiin
Son áigu golmma luohkás gilvalit NM Masters-vuodjamis, ja go olmmoš gilvala de maid ferte hárjehallat. Klemet Turi muitala gaskal 4-6 beaivve vahkkui hárjehallá.
– Ii bija nu gal dan hárjehallama ahte galgá huššaluvvat, galgá leat somá. Dál illudan vuolgit ođđasit gilvalit, dadjá son. Diibmá válddii golli 100 mehter čeallumis, «butterflyas», nu lohká das galggašii aŋkke nagodit golli fas váldit.
– Nu go áššit leat, go eambbo olmmoš boarásmuvvá, de eai šatta buoret áiggit, baicce galggašii doalahit áiggi. Lea nu ahte mun jagis jahkái vuohtán ahte lean boarásmuvvan, čaimmiha son.
Buoremus muitu
Son ii loga diehtit galle golli lea váldán dan rájes go nuorran álggii gilvalit, muhto stuorámus vuoittu lohká máilmmemeašttirgilvvus jiekŋavuodjamis Tallinnis gos faski silbba dán jagi.
– Dat lea stuorámus vuoitu, čázis ledje 1,2 galbmaceahki, dadjá son.
Oasseváldit čieža našuvnnas
Masters-vuodjamis leat buot gilvaleaddjit badjel 25 jagi boarrásat, sii leat miellahtut muhtun vuodjansearvvis ja sis lea vuodjanliseansa. NM Masters-vuodjamii leat 267 gilvaleaddji dieđihan čieža našuvnnas. Leat oasseváldit Norggas, Ruoŧas, Suomas, Estonias, Italias, Spanias ja Australias geat áigot gilvalit iešguđet ahkeluohkáin.