Duhtavaš njealját sajiin
Guovdageaidnulaš Roy Arthur Olsen muitala ahte ledje 2 millimehtera mat earuhedje su beassamis gollefinála báhčit Nm-bivdobáhčingilvvus Krødsheradis Mátta-norgga. – Jus livččen deaivan siskkobeallái rieggá, de livččen beassan ođđasit báhčit golli ektui, lohká Roy Arthur Olsen. NM jaktfelt 2024 lágiduvvui Krødsherad báikkis, mii lea lahka Hønefoss gávpoga Mátta-norggas. Lei Krødsherad JFF mii lágidii jaktfelt dahje bivdobáhčingilvvu cuoŋománu 18.– 21. beivviid.
Badjel 900 báhčči gilvaledje iešguđet luohkáin.
Kautokeino Sportskytterklubb miellahtut Roy Arthur Olsen, Nils Ánte Triumf ja Fred Gøran Haetta dollejedje ovttas máttás Nm-bivdobáhčingilvui mannan vahkkoloahpa.
A-luohkás lei Roy Arthur Olsen dan 11 báhčči searvvis geat báhče 150 čuoggá maid lei vejolaš báhčit. Son muitala ahte go buohkat olahedje ovttamađe čuoggáid, de ledje guokte gova main lei vejolaš čoaggit čuoggáid mat earuhit sin guđet báhčet 150 čuoggá.
– Mun báhčen 18 ja 22 čuoggá ealligovain. De ledjen guokte čuoggá silbbas eret ja golbma čuoggá gollis eret, A- luohkás. Finálas báhčen oktiibuot 46 čuoggá. Okta luođđa lei dušše sullii 2
millimehtera eret siskkit sázus. Jus dan livččen deaivan siskkobeallái, de ledjen beassat ođđasit báhčit golli ektui. Álggos lei hui bahča dovdu, muhto go moadde diimmu golai, de ledjen veahá jurddahallan ja lean hui duhtavaš njealját sajiin Norggameašttirgilvvus, lohká Roy Arthur Olsen.
Liibba fas gilvalit
Norggameašttir oaččui termihkalaš giikkára man árvu lea badjel 40 000 kruvnna ja velá eará vuoittuid.
– Njealját sajis in ožžon maidege. In mun leat olihan visot báhčimis, mun han in vuoitán, muitala Roy Arthur Olsen, gii lea sullii 20 geardde oassálastán NM:S.
Dál lea bivdobáhčinskihpáraččat lihtodan vuolgit NM:I
boahtte jagi. Muitala sii leat soahpan boahtte jagi maid dollet Nm-báhčingilvui mii lágiduvvo seamma báikkis, ja mihttu lea buorebut báhčit go dál dahke. Roy Arthur Olsen rábmo Nils Ánte Triumfa ja Fred Gøran Haetta guoktá bures báhčán NM:S.
– Nils Ánte ii leat nie bures báhčán NM:S ovdal, čuoggáid ektui. Son bođii 20. sadjái iežas luohkás ja oaččui vuoittu ja Fred Gøran Haetta lei vuosttaš geardde NM:S ja dušše guokte čuoggá eret vuoittus iežas luohkás, lohká Roy Arthur ja muitala sin mihttu álo lea vuoitosadjái beassat go servet Nm-gilvui.
Searvá NM:I boahtte jagi maid
Fred Gøran Haetta muitala son
easkka báhčigođii jagi 2020:s bivdobáhčingilvvu. Dán jagi lei vuosttaš jahki go searvvai bivdobáhčima NM:I.
– Lei vuosttaš geardde go mun serven Nm-gilvui. Diehko leat mii vuolgimin boahtte jagi maid. Ii dárbbat vuolgit dohko vuoitit, dat lea maid suohttasa dihte, lohká Fred Gøran Haetta.
Son gilvalii easkkaálgiid bivdoluohkás, dan Jeger C (JC) luohkás, go ii leat báhčán nu olu ovdal.
– Jaktfelt lea bivdobáhčingilvu luođđabissuin mainna bivdá elliid. Ii leat dušše gilvvohallan, muhto lea buorre vuohki hárjehallat bivdui maid. Mun lean Jc-luohkás, Nils Ánte lea Jb-luohkás. Roy Arthur ges A-luohkás mii lea sporterluohkká ja doppe lea báhččiin báhčinbivttas, stuorát giikan ja