– Coop vuovdá turbovuoncáčivggaid
Elliidsuodjalansearvi Anima oaivvilda Coop-jođihangoddi berre guldališgoahtit miellahtuid sávaldagaid ja heaitit vuovdimis turbovuoncáčivggaid Coop-buvddain nu mo Rema 1000 lea dahkan juo 2018:s.
Eanet go čiežas juohke logi Coop-miellahtus sávvet Coop heaittášii vuovdimis Ross 308 vuoncáčivggaid, nugohčoduvvon turbovuoncáčivggaid, dan čájeha elliidsuodjalansearvvi Anima oaiviliskkadeapmi maid Yougov leat dahkan Anima ovddas. Badjel bealli Coop miellahtuin háliidit heaitit gávppašeamis Coop-buvddain jus Coop ii buorit dábiid.
– Turbovuoncáčivga lea šaddaduvvon nu ahte viđa vahkus lossu 50 grámmas 2 kiloi. Go vuoncáčivga lossu ná johtilit, de ii nagot šat vázzit, immuvdnasuodjalus hedjona, juolggit bullet ja šaddá váibmováidun. Coop-miellahtut beroštit elliidčálggus, eaige háliit máksit heajos elliidčálggu ovddas, lohká Anima kampánjajođiheaddji Niklas Fjeldberg preassadieđáhusas.
Lohká Rema 1000, Oda, Strawberry Hotels ja Scandic Hotels leat álgán dahje álgimin čuovvut riikkaidgaskasaš elliidčálgostandárdda «European Chicken Commitment (ECC).
Coop guorahallanseniorráđđeaddi Knut Lutnaes muitala dán jagi almmuhuvvo ođđa elliidčálgodieđáhus mii sáhttá váikkuhit boahttevaš buvttadeapmái. Lohká Coop oaivvilda ahte suorgi ovttasráđiid eiseválddiiguin, berre soahpat oktasaš standárdda mii vuhtiiváldá elliidčálggu, buvttadeddjiid ja kundariid dárbbu.
– Coopas berošta buori elliidčálggus ja mii vuovdit juo vuoncáčivganáliid, nugo Gårdsklekket ja Änglamark ekologalaš vuoncá, mat eai šatta nu johtilit. Nortura dieđihii diibmá ahte Ross 308 vuoncánáli šaddadeapmi heaittihuvvo ja dan seamma lea min váldobuvttadeaddji Den stolte Hane dieđihan. Eat mii ádde manin Anima vuolggaha dákkár kampánjja vaikko dovdet vuoncáčivggasuorggi rámmaeavttuid bures, lohká Coop guorahallanseniorráđđeaddi Knut Lutnaes.
Lutnaes deattuha ahte elliidčálgu Norgga vuoncáčivgabuvttadeamis lea buorre ja dehálamos barggus leat čeahpes boanddat geat lea mielde dutkamis ja norgalaš biebmoloddeealáhusa elliidčálgoprográmma ovttasbarggus.