– Mange tilsette veit dei skal møte opp
avklart kor alle skal. Det er sjølvsagt mange urolege for, seier Solvåg.
For to og eit halvt år sidan blei regjeringa einig om naerpolitireforma. Framtidas politi skulle skapast. Meir naerpoliti, faerre politidistrikt. Meir kontakt med publikum, faerre lensmannskontor. Minst to polititenestemenn pr. 1000 innbyggjarar. Blant anna. Lista var lang.
Ein tapt kamp
For Sogn og Fjordane og Florø blei politireforma ein lang og seig politisk kamp. Ein kamp dei til slutt tapte.
–Vi trudde vi skulle vinne. Sogn og Fjordane politidistrikt var eit av dei mest veldrivne politidistrikta i landet, med høg oppklaringsscore og kort saksbehandlingstid. Å slå oss saman med eit anna politidistrikt med klare utfordringar, var for oss utenkjeleg, seier ordførar i Flora kommune, Ola Teigen (Ap).
IT-kriminalitet
Politikarane reiste til Stortinget, fekk besøk av statsrådar og møtte politileiinga i Bergen.
– Då vi skjønte at løpet for politidistriktet var køyrt, fokuserte vi på å sikre at kompetansen i Florø skulle brukast i fylket. Dette har vi fått meir eller mindre gehør for, men vi er framleis spent på kva politifagleg aktivitet politimeisteren skal fylle huset med, seier Teigen.
–Sjølv om mange politioppgåver openbert må liggje i Bergen, finst det mykje politiarbeid som ikkje er knytt til geografi, som miljø- og IT-kriminalitet.
Geografien fellande
På operasjonssentralen i Florø går dei i nystrokne skjorter og slips kvar dag.
– Det skal vere litt skikkeleg, men her er høgt under taket. Og mykje galgenhumor, seier operasjonsleiar Solvåg, og trekk på smilebandet.
Frå det moderne politihuset, ytst i Sogn og Fjordane, ser ein heilt ut til ope hav. Fram til 1960talet var den vesle halvøya, med bystatus sidan 1860, det sjølvsagde sentrum i Sogn og Fjordane.
I april blei geografien fellande då politimeisteren avgjorde å flytte hovudsetet frå Florø til Førde.
Legg ned eigen jobb
Solvåg starta som leiar for operasjonssentralen i 2015. Året etter kom avgjersla om at stillinga skulle leggjast ned.
– Å vere leiar i ein krevjande periode er ikkje berre enkelt, seier Solvåg.
–Det er tøft å motivere dei tilsette til å auke kvaliteten på tenestene, samstundes som ein veit at det vi bygg opp no, skal ikkje finnast i framtida.
Solvåg rosar likevel eininga for arbeidet som er lagt ned.
– Motivasjon fann vi i yrkesstoltheit og viljen til å gi publikum og patruljane den beste servicen. Det er få som har jobba så mykje for å leggje ned sin eigen jobb.
Kompetanse forsvinn
Då det blei bestemt at operasjonssentralen skulle leggjast ned, fekk dei tilsette i Florø tilbod om å vere med til Bergen. Berre ein takka ja.
– Dei fleste er etablerte med partnar, ungar og venner. Politileiinga i Bergen kom med pendlartilbod om å dekke meirkostnadane i to år, men det var det. For dei fleste var ikkje det nok, seier Kjetil Drange.
Han har arbeidt på operasjonssentralen sidan 2012, med unntak av to år som lensmann i Selje, og var tillitsvalt då avgjersla om samanslåinga kom.
Frå Bergen har det vore stille, sett vekk frå at dei har lova å erstatte stillingane ein eller annan stad i Sogn og Fjordane.
–Det er uggent ikkje å vite kva ein gjer om knappe tre veker. Om ein må pendle langt eller ikkje. Framtida er sett på vent. Dette er eit kronglete fylke, det er ikkje det same å bli flytta frå Bergen Sør til Bergen Nord, seier Drange.
Han fortel at fleire politifolk frå operasjonssentralen har, i mangel på avklaring, allereie søkt seg over i andre stillingar – både i og utanfor politiet.
– Vi misser kompetansen, utan å kunne gjere noko med det.
Slik stoda er no, er det ikkje avklart kor alle skal. Det er sjølvsagt mange urolege for.
Odd Arve Solvåg, driftseiningsleiar for operasjonssentralen i Sogn og Fjordane
Viktige lokalkunnskap
I tillegg til lov og orden, har politiet hovudansvaret for alle redningsaksjonar på land. Medan publikum ser politipatruljar, brannbilar og ambulansar, er det heile styrt frå operasjonssentralen.
– Sogn og Fjordane er eit av tre fylke som årleg har flest redningsaksjonar. Høge fjell og lange fjordar gir krevjande forhold. Når ulykka først er ute, er ein nøydd å vite kven ein kan spele på lag med, seier Solvåg.
Eininga brukar no tid på å overføre lokalkunnskap til Bergen.