Då OL var over, tok dei heilt av
Sjekk bileta frå skøytehallen i OL.
Sør-Korea har teke gull i fellesstart skøyter, og det feststemte publikumet er akkurat gått ut av skøytehallen i Gangneung Oval. Det går berre få minutt før dei frivillige i OL byrjar å rive ned OL-banner, og fjernar putene som har fungert som vant rundt isen.
Det er fleire timar sidan Sverre Lunde Pedersen bomma på kvalifiseringsrunden i fellesstart og forsvann ut av OL. Skøyteisen på det som truleg er verdas raskaste låglandsbane, blir forvandla til ein leikeplass.
Dette var siste skøyteøvelse i OL. No er det er det nye utøvarar som inntek bana. Lydnivået på musikkanlegget vert skrudd opp fleire hakk, og mange frivillige sklir inn på bana. Dei brukar det som er å finna for å leike seg på isen.
Benkar, stolar, plastposar og OL-banner funkar fint som akebrett eller provisoriske skøyter.
Middelaldrande menn blir som ungar ute på isen. Bånn spiker på pute i plast er knall. Den blanke skøyteisen Håvard Holmefjord Lorentzen, Sverre Lunde Pedersen og Sindre Henriksen har teke medalje på, blir omgjort til ein stor leikeplass. Ekte idrettsglede utspelar seg.
Nokon tek fram mobilen for å ta selfie i alle mogelege posisjonar. Andre prøver seg på å sende mobiltelefonen på isen på indre bane, inspirert av curling.
Det er slutt på skøyter i årets OL i Pyeongchang, men for dei frivillige er festen akkurat byrja.