Frå gardbrukar til forbrukar, utan mellomledd
Fleire og fleire vel å kjøpa kjøt og egg og grønsaker og frukt direkte frå bonden. No skal det bli endå lettare.
Silje Een de Amoriza og ektemannen frå Paraguay, Carlos Rodrigo de Amoriza, har lasta kjølevogna med kjøt. Torsdag går turen frå Een gard oppunder Lønahorgi, til Bergen. På parkeringsplassen ved IKEA i Åsane og på Spelhaugen i Fyllingsdalen, skal varene leverast til kundane.
Sikrar lønsemd
– Vi gler oss, seier Silje.
– Denne nye salskanalen vil bidra til større etterspurnad. Dessutan vil han gi større merksemd til lokalmat, til kortreiste jordbruksprodukt og lokale gardbrukarar. Det er bra i seg sjølv.
Een gard er berre ein av fleire lokalprodusentar som marknadsfører varene sine gjennom Rekoring Bergen, som har første utlevering i dag, torsdag. Det er blitt etablert fleire slike ringar rundt om i landet, og Voss får sin eigen denne veka. Ideen har sitt utspring i Frankrike, og blei importert til Finland i 2013. Der er konseptet blitt ein kjempesuksess, med ein årleg omsetnad på
40 millionar euro, tilsvarande
384 millionar kroner, ifølgje grunnleggjaren Thomas Snellman. Også i Sverige har kundane omfamna tilbodet.
Rekoringane som no ser dagens lys, skal fungera som effektive distribusjonskanalar. Gjennom rekoringane skal det bli enkelt for produsentane å selja varer til kunden utan mellomledd. Dette skal vera med å sikra lønsemda til småskalaprodusentar.
Nyvinninga er ein del av Norsk Bonde- og Småbrukarlag sitt prosjekt «Matnyttig», der målet er å auka lokalmatproduksjonen i Noreg, leggja til rette for betre lønsemd, men også å gjera forbrukarane meir medvitne om verdien av småskala matproduksjon og lokal vidareforedling. Thomas Snellman var i Noreg i oktober for å hjelpa til med etableringa her.
Økologisk gard
Praktisk fungerer rekoringen på den måten at produsentane annonserer varene sine på ei felles facebookside. Her kan kundane leggja inn bestillingane sine, og så blir varene leverte til forbrukar på ein på førehand avtalt plass.
Reko er ei forkorting for noko som kan omsetjast til «rettvist konsum». Prototypen blei skapt i Finland for fem år sidan og omfattar i dag 4000 produsentar og 300.000 kundar.
For Een gard er rekoringen ikkje avgjerande, men eit viktig supplement, saerleg i dei litt stille periodane. Dei siste fire åra har alt dei produserer, blitt seld direkte til forbrukarar, spesialforretningar og restaurantar. På kundelista står mellom andre Fleischers Hotel, Dr. Wiesener og Bare Restaurant, i tillegg til mange private. Meir enn tre og eit halvt tonn (slaktevekt) med kjøt, til ein verdi av meir enn 600.000 kroner finn årleg vegen frå Een, til ulike matfat rundt omkring i Hordaland. Garden blir drive økologisk, med vekt på å nytta heile dyreskrotten, innmaten inkludert.
Vekt på dyrevelferd
– Frå hovud til hale. Det er prinsippet vi lever etter. Mange kundar viser seg å vera opptekne av det same. Forbausande mange etterspør innmat, seier Silje.
På Een gard lever dyra av gras. Bruken av kraftfor er redusert til eit minimum. Om sommaren beitar dyra i utmarka og i fjellet, og kalvane får vera med mødrene sine heile livet. Alt dette er konkurransefortrinn som kundar veit å setja pris på. Dyra på garden er av den utryddingstruga rasen vestlandsk fjordfe.
Det er Silje sin far, Arvid Een, som framleis driv bruket, med hjelp av Silje og ektemannen. Men meininga er at den nye generasjonen skal overta i løpet av nokre få år. Dei har klart seg godt utan grossistleddet og har til hensikt å selja direkte til kunde også i framtida. – Det er ei heilt anna lønsemd å driva slik vi driv no. Vi tener minst det dobbelte på direktesal. Dessutan synest vi det er kjekt å ha den naere kontakten med kundane. Vi har nok funne vår måte å omsetja på, seier Silje Een de Amoriza.