Pengekrangel på Knarvik Senter
Senterforeininga har saksøkt eigaren av lokalet der Vinmonopolet er leigetakar.
I desember 2014 vart Vinmonopolet tilgjengeleg på Knarvik Senter utanfor Bergen.
Då Knarvik Handel gjorde leigeavtale med alkoholutsalet, fritok dei Vinmonopolet frå senteravgifta.
Det hadde dei ifølgje Knarvik Senterforening ikkje rett til.
Økonomisk bakrus
Senterforeininga har difor teke ut søksmål mot eigaren av lokalet.
Dei krev 865.385 kroner i tapt senteravgift, samt betaling i all den tid Vinmonopolet leiger lokale i kjøpesenteret.
«Det er kun Senterforeningen som kan frita en forretningsdrivende i Senterforeningen fra plikten til å betale senteravgift», skriv advokat Atle Birkeland.
Han held fram at det er vanleg praksis at leigetakarar pliktar å betala ei slik avgift. Dessutan nyt Vinmonopolet godt av tenestene foreininga betalar for.
Senterleiar Jimmy Pasali ønskjer ikkje å kommentera saka før ho er ferdig handsama i retten.
Eineståande drykk
Det unike i denne saka er knytt til Vinmonopolet.
Vanlegvis er det slik at alle leigetakarar betalar avgift til senterforeiningar, men slik er det ikkje for det saereigne alkoholutsalet.
Avgifta går til mellom anna marknadsføring, og slikt skal ikkje Vinomonpolet halda på med. Ikkje berre i Knarvik, men i heile Noreg.
Utsalsstaden hadde vore ønskja til senteret i mange år, og senterforeininga skal ha vore kjend med at Vinomonpolet ikkje kunne godta vanlege vilkår.
Difor vart det allereie i 1998 laga eit saerskilt vedtak hjå styret i senterforeininga som fritok Vinomonpolet frå slik betaling.
Fritak for marknadsføringsavgift skal også ha vorte vedteke på ei generalforsamling i mai 2014, eit halvår før etableringa deira på kjøpesenteret.
Blandingsoppfatning
På grunn av denne avtalen meiner Knarvik Handel at dei hadde rett til å frita Vinomopolet frå betaling. Dei avviser søksmålet og krev frifinning.
«Det var ikke tvilsomt at Vinmonopolet som kundemagnet var ønsket til Knarvik Senter», skriv Stig J. Harris, advokat for Knarvik Handel.
Knarvik Senter meiner på si side at leigeavtalen viser at Knarvik Handel skal ta mange av dei kostnadane som foreininga betalar gjennom avgifta.
Dette vert avvist av eigaren. Uavhengig av kva som står i leigeavtalen «kan ikke Senterforeningen bygge noe rett på en avtale som de selv ikke er part i».
Harris skriv vidare at Vinmonopolet bidreg til så mykje meiromsetnad på senteret at det er svaert usikkert kva tap som er påført, om enn noko.
Rettsaka byrjar måndag 19. mars i Bergen tingrett.
«Det var ikke tvilsomt at Vinmonopolet som kundemagnet var ønsket til Knarvik Senter».
Stig J. Harris, advokat for Knarvik Handel