Tilskot og inntening ved Kode
Staten: 23.350.000 kroner Hordaland fylkeskommune:
3.787.000 kroner
Bergen kommune:
53.044.600 kroner Prosjekttilskot frå offentlege og private givarar:
38.838.598 kroner
Billett- og salsinntekter:
24.419.282 kroner
Anna driftsinntekt:
9.157.059 kroner
Fleire tusen kunstgjenstandar blei ved eit uhell dekte av etsande støv under oppussinga av Kode 1. Å fjerne det vil koste millionar, og det er enno ikkje avklart kor mykje forsikringsselskapet vil dekke.
– Vi vil vere i ein vanskeleg situasjon om vi ikkje får dekt alle kostnadane ved støvproblemet over forsikringa. Vi har ikkje noko økonomisk handlingsrom i året som kjem, seier Snare.
Kven som tar rekninga kan bli avklart allereie denne veka.
– Vi har hatt inne nye ekspertar frå vårt britiske forsikringsselskap. Slik stoda er no, held vi oss til dette som ei forsikringssak. Det viktigaste for meg er få sett i gong oppryddingsarbeidet. Det blir utsett, men eg håpar vi skal bli ferdige før 2018 er over, seier Snare.
– Frykta det kunne bli verre
På same tid som Kode har sitt største underskot nokon gong, har dei også sett publikumsrekord, og tent meir pengar enn før.
Likevel var styreleiar Henning Warloe førebudd på dei raude tala, og seier at styret var informert, men ikkje hadde oversikt over kor stort underskotet kom til å bli før i haust.
– Dette resultatet kom ikkje som noko stort sjokk. På grunn av oppussinga av Kode 1, har situasjonen vore uoversiktleg, og vi har også høgare driftskostnadar enn vi har råd til. Eg hadde frykta det kunne bli verre enn dette, fortel Warloe.
– Kor ille?
– Det vil eg ikkje seie.
Ut ifrå styret si årsberetning er det dei 14 millionane i negativ eigenkapital det hastar mest med å bli kvitt.
– Det skulle vi gjerne vore forutan, og vi kan ikkje halde fram å ha det slik. Kode har vore i ein slags unntakstilstand dei siste to åra med oppussingsprosjekt, stengde bygg og finansiering. Det skaper ustabilitet.
– Kor viktig er det at kostnaden med støvproblemet blir dekt av forsikringa?
– Vi ser på det som ei forsikringssak, og eg har ingen kommentarar utover det, seier Warloe.
Byråden vil ha forklaring
Bergen kommune er den største bidragsytaren til Kode.
I tillegg til naudlånet på 14 millionar etter kostnadssprekken på Kode 1, har dei også gitt museet 53 millionar kroner i tilskot til dagleg drift.
Onsdag skal Kode møte kulturbyråd Julie Andersland for å snakke om økonomien.
– Eg forventar at dei har ei forklaring på kvifor det er blitt som det er blitt, seier Andersland.
Utover det vil ho ikkje kommentere verken underskotet eller andre delar av Kode sin økonomi.
– Vi veit at det er fleire museum som har økonomiske utfordringar. Eg vil snakke med Kode og vite meir om bakgrunnen før eg kommenterer noko utover det.