Morten Myksvoll

Når flamme møter kjøt, kjem hulemannen fram i oss. Sjølv ikkje skogbrannfare stoppar oss frå å nyte pølser i friluft.

EINGONGSGRILLAR ER DYRE, dårlege og farlege. Kvar for seg kostar dei lite, men har du vener, treng du meir enn éin grill. Og sjølv i løpet av ein vanleg bergenssommar, kan det gå med eit par hundrelappar til å kjøpe dette dårlege produktet.

Dei brenn for lite til å grille skikkeleg, men godt nok til å fyre opp ein skog. I helga brann det i eit bosspann på Muséplass, ved Strusshamn kyrkje og i graset på Sikthaugen. Årsaka var eingongsgrillar.

Oslo brann- og redningsetat innførte totalforbod mot open eld allereie førre tysdag. Der har brannvesenet hatt ein svare strev med å køyre frå stad til stad for å sløkkje grillar og kjefte på vaksne folk som ikkje evnar å rette seg etter pålegg.

NORDMENN HAR GODT AV å vere litt skeptiske mot autoritetar, men brannvesenet har du med å høyre på. Når dei seier at ein ikkje kan grille, så er det god grunn til det. Skogbrannfaren er høg, og ein liten grill kan få enorme konsekvensar.

Når det er gått fleire dagar sidan totalforbodet vart innført, må ein forvente at folk har fått det med seg. Problemet er at mange ikkje bryr seg.

Det er forstemmande at brannvesenet må truge med politimelding, bøter og erstatningskrav før folk tar forbodet på alvor. Ikkje brenn ned byen for lunkne pølser. Det burde vere oppmoding nok.

DET ER PÅ TIDE Å FORBY eingongsgrillar permanent. Ja, folk har fyrt opp bål òg, men eingongsgrillane bør det vere grei skuring å bli kvitt. Bergen kommune bør gå framfor med eit lokalt forbod. Butikkar som ønskjer å profilere seg som miljøvenlege, bør slutte å selje svineriet.

– Det er ikke alle som har tilgang til terrasser med permanent grill, og jeg mener alle bør ha muligheten til å grille i det fri, sa Camilla Wilhelmsen (Frp) då Miljøpartiet dei Grøne ville innføre eit forbod i Oslo i 2015.

Det er eit elendig argument.

For alternativet til eingongsgrillar er ikkje å kjøpe seg ein eigen terrasse og dyr gassgrill. Nei, for eit par hundrelappar får ein heilt greie berbare kolgrillar, som varar lenge.

DET ER PÅ TIDE Å STIGMATISERE bruken av eingongsgrillane. Politiet i Haugesund brukte totalforbodet i helga til å teste ut ny retorikk mot dei eingongsgrillande. «Mann (36) avhørt som mistenkt og erkjente bruk av engangsgrillen. Sak opprettes.», skreiv dei på Twitter.

Ulempene ved bruken av eingongsgrillar er så store, at det er heilt greitt å forby det. Både for grillarane og naturen sin del. Berre nokre veker etter at titusenvis av frivillige rydja strender for plast, sleng folk rundt seg med grillar i hytt og pine.

VISS EINGONGSGRILLANE var skikkeleg gode, kunne ein forstått at folk prioriterte matglede framfor naturen. Men dei er jo elendige. Desse svake produkta yt ikkje rettferd mot maten ein grillar. Det finst ikkje eit handtak å ta i, og det er berre nokre spinkle spilar som skil kolet frå graset.

Ventar du litt for lenge med å leggje noko på grillen, kan du berre gløyme gjennomsteikt kylling.

Berre nokre veker etter at titusenvis av frivillige rydja strender for plast, sleng folk rundt seg med grillar i hytt og pine.

FOR NOKRE ÅR SIDAN FLATA salet av eingongsgrillar ut. Éin million grillar er eit vanvettig høgt tal. Når ein grillar, tar ein gjerne òg med seg eingongsbestikk og eingongstallerkenar. Saman med eingongsglas. Igjen finst det gode alternativ som varar lenge. Det burde ikkje vere så vanskeleg.

Grilling tar mennesket tilbake til røtene. Det er flamme på kjøt, slik naturen ville ha det. Men i dag representerer grillinga «bruk og kast»-samfunnet på sitt aller verste.