9000 hyttefolk vil ikkje betala bompengar for tryggare veg
Ein tunnel skal trygga rasutsette Tokagjelet i Kvam herad. Hyttefolket på Kvamskogen kan få mindre gjennomgangstrafikk, men vil ikkje bla opp for løysinga.
Rekkefølgjekrav om ny gang- og sykkelveg, samt mangel på pengar, har ført til årelang stillstand på Kvamskogen.
Området er ikkje vorte utvikla og tomteeigarar sit på overtid og ventar.
Samstundes har hyttefolket ropt høgt og lenge etter tryggingstiltak.
– Eg kjenner eit ubehag, fortalde Åse Ellen Bech til BT i vår, om korleis det var å kryssa vegen på Kvamskogen.
Vil sikra med tunnel
No har det heile hamna i ein politisk dragkamp om rassikring av Tokagjelet, den bratte vegen mot Norheimsund.
Kvam herad, fylkeskommunen og vegvesenet meiner tunnel er det beste for sikring og har sett i gang eit planprogram.
Seks ulike alternativ har tidlegare vore på bordet og prislappen spenner frå vel 900 millionar til godt over to milliardar kroner.
Rassikringsmidlar, bompengar og fylkeskommunal stønad skal finansiera prosjektet.
I ein høyringsuttale skriv Kvamskogen Vel at trafikktryggleiken berre kan sikrast med ny tunnel frå Steinsdalen til Eikedalen.
– Ekstremt farlige forhold
Styreleiar Eva Grimstad viser til at naermare 9000 hyttebrukarar stiller seg bak uttalen til vegvesenet.
Tunnelalternativet dei går gode for ligg på Norheimsundsida av Kvamskogen og har ein estimert kostnad på 1,3 milliardar kroner.
«Hytteeiere på Kvamskogen har i altfor mange år måttet leve med ekstremt farlige trafikkforhold. Dette gjelder et samlet antall mennesker som faktisk er større enn de fastboende (8471) i Kvam Herad med til sammen naermare 9000 hyttefolk i tillegg til mange dagsturister i vinterhalvåret», skriv Grimstad.
Mot bompengar
Kvamskogen Vel ser føre seg at dei ikkje må bruka tunnelen for å koma seg til hytta. Difor vil dei reservera seg mot bompengar.
«Vi ber om at bompengeinnkrevingen knyttes direkte til bruk av tunnelen», skriv Grimstad.
Velforeininga krev også at fartsgrensa må ned til 60 kilometer i timen over heile Kvamskogen inntil tunnel er på plass.
Dei meiner også at Kvam herad må oppheva rekkefølgjekravet så snart planarbeidet har starta.
Velforeininga skriv at dei er positive til Kvamskogen Naeringslag sitt forslag til gang- og sykkelveg.