Klare krav til TV 2kontoret i Bergen
I den nye avtalen med TV 2 stiller Staten langt meir detaljerte krav enn før til aktiviteten på hovudkontoret i Bergen.
– Skal vi gå og signere, spurte TV 2-sjefen.
– Ja, svarte kulturministeren.
I blitsregnet i Media City Bergen skreiv Trine Skei Grande og Olav Sandnes under ein ny avtale mellom TV 2 og Staten onsdag morgon.
TV 2 får 135 millionar kroner i året som kompensasjon for å ta på seg rolla som kommersiell allmennkringkastar ut 2023.
Staten på si side stiller for første gong langt meir detaljerte krav til den redaksjonelle aktiviteten på hovudkontoret i Bergen. Kvart år må TV 2 dokumentere at lokaliseringsvilkåra er oppfylte.
Medietilsynet kjem til å følgje nøye med.
Må dokumentere aktivitet
Eit av vilkåra er at fleirtalet av små og store redaksjonelle avgjerder i TV 2 skal skje i Bergen – anten det gjeld sendeskjema, programinnkjøp eller spørsmål om publisering.
TV 2 må kvart år dokumentere kor mange redaksjonelle årsverk som er nødvendig for å kunne ha hovudkontor i Bergen. Meir enn halvparten av desse årsverka skal ha Bergen som arbeidsstad.
Også nyheitsredaktøren i TV 2 skal ha Bergen som arbeidsstad – men berre for den delen av stillinga som gjeld allmennkringkastingsoppdraget.
I praksis betyr det dei daglege nyheitssendingane på hovudkanalen klokka 18:30 og 21.
– Ingen større endringar
Dette kravet kjem ikkje til å føre til større endringar i arbeidskvardagen til nyheitsredaktør Karianne Solbraekke i TV 2. Ho har adresse i Oslo, men jobbar på hovudkontoret i Bergen fleire dagar i veka.
– TV 2 Nyhetene klokka 18:30 og 21 er dei mest ressurskrevande sendingane vi har. Eg er i Bergen to til tre dagar i veka uansett og har leiligheit i Bergen. Dette får ingen praktiske konsekvensar for meg, seier Solbraekke.
TV 2 kjem til å oppbemanne bergenskontoret med ti stillingar, dei aller fleste journaliststillingar. Ingen lokalkontor blir lagde ned.
– Mange i Bergen fortener ein ekstra takk i dag. Dette er ein festdag for TV 2 og ein historisk dag for mediemangfaldet i Noreg, sa Sandnes på pressekonferansen.
– Ein moderne avtale
– Det vi har gjort i dag, er å signere ein moderne og attraktiv avtale for kommersiell allmennkringkasting også utanfor Oslo. Avtalen sikrar ein god nyheitsproduksjon frå eit mediemiljø utanfor Oslo. Det er essensielt for mediemangfaldet, sa Grande.
Det er eit år sidan TV 2 sende sin søknad om å bli kommersiell allmennkringkastar. Verken Sandnes eller Grande la skjul på at prosessen har vore tøff.
– Det har vore ein lang maraton. I dag kryssar vi mållinja. Tusen takk for avtalen, kulturminister! Vi skal jobbe hardt for å halde på den, sa TV 2-sjef Sandnes.
Mange i Bergen fortener ein ekstra takk i dag. Dette er ein festdag for TV 2 og ein historisk dag for mediemangfaldet i Noreg.
Olav Sandnes, TV 2-sjef