Rekordmange flyktningar på jakt etter jobb

Historisk mange flyktningar skal prøve å stå på eigne bein i haust. Åttebarnsfaren Mahmoud (52) er ein av dei.

Kina, Tyrkia, Thailand. Fabrikkeigaren i Aleppo var ofte på forretningsreise i utlandet. Men det var eitt land Mahmoud Natour

(52) drøymde om å få sjå. Noreg. I august 2016 kom han og familien hit, men ikkje som turistar, slik han hadde drøymt om. Dei kom som del av den store flyktningstraumen.

Åttebarnsfaren var blant dei 15.200 personane som fekk opphald i Noreg det året; heile

64 prosent fleire enn året før, ifølgje SSB.

Det store fleirtalet kom frå Syria, og mange er blitt bergensarar. I 2016 og 2017 busette kommunen 871 syriske flyktningar.

No står Bergen framfor tidenes integreringsløft.

– Eit samfunnsansvar

I løpet av hausten og våren blir rundt 500 flyktningar i Bergen ferdige med det toårige innføringskurset. No skal dei prøve å stå på eigne bein, skaffe seg jobb eller gå på skule.

– Dei er mange! Å hjelpe dei til å klare seg sjølve er ei stor utfordring. Det er også eit samfunnsansvar, både for det offentlege og naeringslivet, seier Anne-Marit Presterud, direktør for Etat for inkludering.

– Dette handlar ikkje berre om nok praksisplassar og jobbar. Ein del av flyktningane har lite eller inga grunnutdanning frå heimlandet. Det er dei som får lengst veg å gå.

Eg vil ikkje leve på Nav! Eg vil jobbe og forsørgje familien min.

Mahmoud Natour

– Vi mista alt

I eit gult trehus i Ytre Arna prøver familien Natour å byrje på nytt i landet langt heimanfrå. Krigen i Syria, som no er inne i sitt åttande år, snudde livet opp ned.

– Vi mista alt. Fabrikken, huset. Eg var redd for å miste barna også, seier Natour på gebrokkent norsk.

No er han på jobbjakt, ein uvant situasjon. I Aleppo var det han som var sjefen, han som tilsette folk. Natour hadde 65 tilsette på emballasjefabrikken sin. Barna kom som perler på ei snor, to par tvillingar inkludert.