Barnemangelen
Sjuande far i BT
og gjorr LIGG DOKKAR SAMMEN nokke!
Gammalordførar Harry Hansen la korkje fingrane eller noko som helst anna imellom den gongen Bergen risikerte å bli forbigått av Trondheim i folketalkonkurransen. Og Erna? I trontaledabatten førre veka pusa ho fødselspolitikken sin til med at regjeringa ville sjå på kva som er mogleg for å stimulera fleire til å få fleire barn. Harry Hansen ville snorka.
Statsministeren fryktar det vil bli ynkeleg små skatteinntekter å flotta seg med når eldrebølgja oversvøymer land og folk og barnehagar blir gammaldansklubbar. Ho trur visst det er mangel på regjeringsstimulansar som gjer at kjønnsmogne kvinner som aettar frå Harald Hårfagre ikkje gjorr nokk når di liggar seg sammen me’ nokken.
ERNA MÅ TRU OMATT. Erna er ute og syklar. I kondombunad. Ho burde heia på kvinner som nøyer seg med 1.6 barn. Dei tek ansvar for overfolking og naturøyding og klimakrise. Dei tek inn over seg at norske barn ikkje er berekraftige. Norske barn flyg til Syden i haustferien og driv russebussplanlegging før dei er ferdige med ungdomsskulen. Norske barn tek kverken på planeten.
Norske foreldre og besteforeldre og onklar og tanter er for så vidt ikkje berekraftige, dei heller. Men halvgamlingane og heilgamlingane syng trass alt på siste versa. Moder jord takkar og prisar gammalnorske kvinner som knip igjen og tenkjer på klimagassane.
Om Erna absolutt skal ha fleire barn til disposisjon når eldrebølgja toppar seg, er det nok å opna grensene. Eit lite gløtt er nok til å fylla alle bauekorps med nynorske barn. Eldrebølgja her oppe i nord er eit lite skvalp samanlikna med barnebølgja der nede i landa.
ALLE IMPORTERTE BARN vil kanskje ikkje bli veganar og fretexfrelste og innmelde i Naturvernforbundet og Framtida i våre hender når dei blir store. Det er ein viss risiko for at somme nynorskingar blir like gammalnorske i hovudet som russebussrussen. Men Erna ville sleppa mardraumar om gammaldans i barnehagane.