Nato fyller Vågen med mineryddarar
Sju mineryddarfartøy blir å sjå i Bergen, på veg til den største Nato-øvinga på fleire tiår.
eDei sju skipa skal alle vere med på Nato-øvinga Trident Juncture, som byrjar torsdag i neste veke. Over 50.000 soldatar skal delta, frå meir enn 30 ulike nasjonar, og det blir stor aktivitet både på land, i lufta og på sjøen.
På sjøen er øvingsområdet ute i Norskehavet, og langs kysten frå Bergen nordover til Vestfjorden i Nordland.
Frå laurdag til onsdag vil sju utanlandske mineryddarfartøy liggje til kai på Vågen. Dei to første, kanadiske HMCS «Summerside» og HMCS «Glace Bay», kom allereie torsdag.
Også den norske mineryddaren KNM «Måløy» frå Haakonsvern skal vere med på Trident Juncture.
Totalt 70 skip
– Dei skal øve på å rydde miner og sikre sjøvegane. Det er avgjerande for å sikre at allierte styrkar kan kome til unnsetning sjøvegen, seier kapteinløytnant og presseoffiser Thomas Gjesdal.
Mineryddarane er alle med i Natos ståande mineryddarstyrke.
Totalt 70 skip, inkludert det gigantiske amerikanske hangarskipet «Harry S. Truman», skal delta i øvinga, som er den største Nato har hatt i Noreg på fleire tiår.
Også
fregattar,
korvettar, ubåtar og kystvaktfartøy er med.
Styrken vil bli delt opp i ein nordflåte, som nå er på veg frå Island, og ein sørflåte som skal samle seg i Trondheim.
– Scenarioet vi skal øve på, er at Noreg er under angrep og at allierte skal kome til unnsetning. Dei skal vise vilje og evne til å forsvare oss, og vi skal vise at vi kan ta imot dei, seier Gjesdal.
Følg med på radioen!
Heile Sjøforsvaret, både Kystvakta og Marinen, er involvert, og ca. 1700 norske soldatar og offiserar skal delta i sjøoperasjonane.
Øvinga betyr at det dei neste tre vekene vil bli mange militaere fartøy å sjå på sjøen. På Mørekysten vil det også bli minesprenging med skarp ammunisjon.
– For sivile på sjøen er det viktig at dei held trygg avstand, og at dei følgjer med på radioen, seier Gjesdal.
På landjorda vil det meste skje i dei nordlege delane av Oppland og Hedmark, og sør i Trøndelag.
Dei skal vise vilje og evne til å forsvare oss, og vi skal vise at vi kan ta imot dei.
Thomas Gjesdal, kapteinløytnant og presseoffiser