Hadde sola imot før kollisjonen
– Vi køyrde mot sola og såg ikkje marinefartøyet før det var for seint. Det er forklaringa til mennene som søndag kolliderte med KNM «Olav Tryggvason».
Kollisjonen med marinefartøyet KNM «OIav Tryggvason» vart meldt klokka 16.09 søndag.
– Mennene i fritidsbåten ønskjer ikkje snakke med media nå, men har bedt oss formidle dette: Sola stod lågt, dei hadde henne rett i mot, og dei såg ikkje det militaere fartøyet før det var for seint, seier politioverbetjent Sven Erik Midthjell ved Sotra, Askøy og Øygarden lensmannsdistrikt.
Dreiv jakt og fiske
KNM «OIav Tryggvason» hadde deltatt i bergingsarbeidet med KNM «Helge Ingstad», og var på veg sørover i Hjeltefjorden då det small søndag ettermiddag.
Den 15 fot store fritidsbåten vart løfta om bord i marinefartøyet etter kollisjonen, saman med dei to mennene.
Ifølgje politiet høyrer begge heime på Askøy og var på sjøen for å drive fiske då det gjekk gale.
– Kan prise oss lykkelege
– Vi har snakka med dei involverte i begge fartøya, og vi har også snakka med andre vitne. Det står att noko etterforsking, seier politioverbetjent Midthjell.
KNM «Olav Tryggvason» skal ha sett fritidsbåten kome imot, men forsøket på ein unnamanøver lykkast ikkje. Fritidsbåten trefte marinefartøyet på babord side.
Fritidsfartøy har ei generell vikeplikt for nyttefartøy.
Ingen vart alvorleg skadde i ulykka, og ingen hamna i sjøen.
– Vi kan prise oss lykkelege over at det ikkje gjekk verre, seier politioverbetjent Midthjell.
Statens havarikommisjon for Forsvaret, som undersøkjer alvorlege hendingar i Forsvaret, har sendt to representantar til Bergen for å sjå naerare på saka.
Neppe eiga gransking
– Dei har snakka med besetninga på KNM «Olav Tryggvason» og henta inn ein del dokumentasjon. Førebels er det snakk om ei forundersøking. Ingenting tyder heller på at vi vil gå i gang med ei full undersøking, seier Håkon Sitre, som er konstituert leiar for Statens havarikommisjon for Forsvaret.
– Kvifor ikkje?
– Så vidt vi kan sjå er ikkje vårt bidrag i denne saka nødvendig for å auke tryggleiken i Sjøforsvaret.
Vi kan prise oss lykkelege over at det ikkje gjekk verre.
Sven Erik Midthjell, politioverbetjent