Ei tredje gransking av fregatt-havariet i gang
Torsdag kjem dei første svara om kva som gjekk gale med KNM «Helge Ingstad». Ein kommandørkaptein frå Bergen skal leie Sjøforsvarets interne gransking.
Kollisjonen mellom KNM «Helge Ingstad» og tankskipet «Sola TS» ligg an til å bli ei av dei dyraste norske skipsulykkene i nyare tid. Både politiet og Statens havarikommisjon er i full gang med jakta på årsaka til havariet.
Ein første, førebels rapport frå havarikommisjonen blir lagt fram på Lillestrøm torsdag.
I tillegg er også ei tredje gruppe granskarar på banen: Forsvarets eiga undersøkingsgruppe.
Dei er oppnemnde av Sjøforsvarets sjef, kontreadmiral Nils Andreas Stensønes, for å undersøkje kva som skjedde natt til 8. november.
Granskar på fulltid
Arbeidet blir leia av kommandørkaptein Pål Gudbrandsen (44) frå Bergen. Med seg har han fått sju menn og ei kvinne – alle frå Forsvaret – som skal kartleggje fleire sider av ulykka:
Finne ut av kva som hende og ulykkesårsaka.
Klarleggje kva lover, forskrifter, instruksar eller ordrar som gjald for oppdraget fregatten var ute på.
Uttale seg om korleis tilsvarande ulykker i framtida kan unngåast.
– Dette er ei intern undersøking i Forsvaret – til forskjell frå Havarikommisjonen, som er heilt uavhengig. Gruppa er godt i gang med arbeidet. Planen er at dei skal vere ferdige innan eit halvt års tid, litt avhengig av kor komplisert dette blir, seier kontreadmiral Stensønes.
Undersøkingsleiar
Pål Gudbrandsen arbeider i dag i Forsvarsstaben i Oslo. Han har blant anna bakgrunn som skipssjef, og har gått Sjøkrigsskulen. Gruppa skal ifølgje Stensønes alle arbeide fulltid med undersøkingane, med eit par unntak.
Ønsker komplett bilete
Interngranskinga kjem på toppen av dei to andre store undersøkingane som har halde på sidan ulykkesnatta:
Vest politidistrikts etterforsking av dei strafferettslege sidene ved havariet. Målet er å finne ut om den sivile eller militaere straffelova vart brote då ulykka hende. Det blir deretter opp til Statsadvokatane i Hordaland å vurdere om nokon eventuelt skal straffast.
Arbeidet til Statens havarikommisjon for transport. Dei skal kartleggje alle detaljar i hendingsforløpet, og prøve å finne ut kva som gjorde at ulykka skjedde. Havarikommisjonen samarbeider med Statens havarikommisjon for Forsvaret og den maltesiske havarikommisjonen, som er involvert