Pengane må gå til rassikring, ikkje Hordfast
«PÅ VEGEN BETYR Vestland fylke «fare for ras», skriv BT 19. februar. Og vidare: «Her sto Linn (20) med sørpe til livet etter å ha krasjet I raset – jeg må ha besvimt et øyeblikk», og ikke minst «Dette er stedene som trenger skredsikring».
Det er overskrifter som ikkje er til å ta feil av, same dag som Nasjonal rassikringskonferanse vert arrangert her i Bergen. Same dag står eit debattinnlegg signert landets NHO- og LO-sjef med overskrifta: «LO- og NHO-sjefane er enige: Vestlandet trenger Hordfast». KLIMAFORSKARANE GIR klar beskjed. Framtida blir mildare og våtare. Framtidsprognosen er meir skred og ras. Det vert ikkje folk trygge av. I nye Vestland er behovet for midlar til rassikring og gul midtstripe utømmeleg. Men er det framleis nokon som lurer på kor alle midlane til rassikring vert av?
Denne dagens BT seier alt. NHO, LO-sjefane og det store fleirtalet av politikarar i heile det nye Vestland og Rogaland prioriterer konsekvent gigantiske fjordkryssingsprosjekt med firefelts motorveg framfor rassikker og trygg veg. Denne alliansen har fått lagt premissane altfor lenge, med utrygge vegar i distriktet som resultat.
NO MÅ FLEIRE INNSJÅ at dei som stadig ropar om motorvegar inn til dei store byane og ferjefri E39, må verte erstatta av ein ny og forsterka allianse mellom Distriktsnoreg og den nye miljørørsla i byane. Denne alliansen må ha til felles at dei evnar å prioritere vegmidlane der dei trengst som mest, og seie nei til store vegprosjekt.
DET BÅDE UROAR og overraskar meg at NHO- og LO-sjefane framleis fokuserer så eintydig på dette prosjekta, når realitetane på vegane i distriktet ikkje berre er til å «bli gal av», eller få «sørpe til livet» av, men utgjør ein kontinuerleg fare for liv og helse.