Løne-brør kjempar i retten om smalahovegarden
Den yngste av brørne bur på garden, og driv verksemda. No viser den tre år eldre broren til odelsretten og går rettens veg å få overta garden.
Striden mellom dei to brørne kjem etter at «smalahovekongen» Ivar Løne døydde i fjor, 78 år gammal. Måndag og tysdag møtes brørne Geir Løne (48) og Lars Løne (51) i tingretten.
Geir Løne er dagleg leiar og styreleiar for verksemda på Løne-garden, Ivar Løne AS, som omsette for 13.754.000 kroner i 2018. Verksemda er den einaste store produsenten av svidde smalahove her til lands.
Lars Løne driv som entreprenør. Verksemda hans, Løne Maskin & Transport AS, hadde elleve tilsette og omsette for 18.681.000 kroner i fjor.
Odelsgard
Begge partar er samde om at garden er ein odelsgard. Striden kjerne er om den eldste broren skal få garden på odel, eller om den yngste har lagt ned så mykje innsats og arbeid, og er knytt til garden slik at det opphevar den eldstes odelsrett.
I sin partsforklaring i retten måndag sa eldstebror at saka uansett ikkje skal gå ut over vossebygda om han får overta garden. Om den yngre broren ikkje ville lei gap las stilproduksjons verk sem da, skulle han få andre til å overta.
Geir på si side, sa i si partsforklaring at Lars ikkje er til å stola på.
– Familiebedrift
Då BT var på besøk på garden, som ligg mellom E16 og Lønavatnet, før jul i 2015, kunne vi fortelja at Ivar Løne i løpet av dei siste 40–50 åra hadde bygd opp ei familiebedrift som leverer 70.000 smalahove, tonevis med pinnekjøt og mange andre kjøtprodukt.
«Ivar Løne har selv måttet innta en noe mer tilbaketrukket funksjon på grunn av sviktende helse. Sønnen Geir er nå den som driver produksjonen, men far sjøl er fortsatt sjef.», skreiv BT den gongen.
I sitt sluttinnlegg for retten legg advokat Robert Neverdal, som er prosessfullmektig for Geir Løne, vekt på at klienten har lagt ned mykje arbeid og ressursar på garden. Og at han dessutan har landbruksretta utdanning.
– Strenge krav
«Geir Løne har sitt arbeid på gården. I tillegg har han stiftet familie som også er involvert i den daglige driften på gården. Dette gjelder både ektefelle og to barn.», skriv Neverdal i sitt sluttinnlegg.
Han meiner at grunnlaget for dagens drift fell bort om det blir ei odelsløysing på saka.
Eldstebror, Lars Lønes prosessfullmektige er advokat Endre Grande. Han slår i sitt sluttinnlegg fast at det i lang tid har vore kjent at Lars ønskjer å overta garden, og at odelsretten må gjelda:
«Saksøker gjør gjeldende at de strenge krav rettspraksis har stilt opp for å fravike hovedregelen om den eldstes rett til å overta odelseiendom, ikke er innfridd i dette tilfelle.», skriv Grande.