Krigen sett med tyske auge
Dette er unike bilete frå krigen i Hordaland i 1940. Det er tyske soldatars eigne foto.
– Dei tyske soldatane vart oppfordra til å fotografera og dokumentera krigen. Det er slike bilete boka er full av, seier Vegard Nordås Toska.
Han har nett gjeve ut boka «Hordaland i krig. Krigsåret 1940 sett fra den tyske siden» på Kapabel forlag.
– Upubliserte foto
– Korleis har du fått tak i desse bileta?
– No når mange av dei tyske krigsveteranane er gått bort, har familiane lagt ut fotografi og samlingar til sal på nett. Det er slike samlingar eg har kjøpt, seier Toska.
Han seier at om lag 90 prosent av bileta i boka ikkje har vore publisert før no. Boka som er ein murstein på 328 sider, er full av bilete.
Her er frå fotografi frå heile Hordaland; invasjonen i Bergen og bombinga på Voss og frå dagleglivet til dei tyske soldatane.
– Innblikk i deira tankar
– Er du redd for at folk trur du stør okkupasjonen når du gjev ut ei slik bok?
– Nokon kan kanskje tru det, men det gjer eg ikkje. Målet med boka er å gje eit objektivt innblikk i dei tyske okkupantane sine tankar og handlingar. Eg håpar det kan gje eit meir samla bilete av vår lokale krigshistorie, seier Toska.
Under arbeidet med boka har han sett korleis hendingar blir fortalt ulikt på kvar side i krigen. Det er mange mytar og forteljingar, og feilinformasjon frå norsk side og.
– Tyskarane var overraska over kor sterk motstanden i Norge var. Særskilt kor mykje den tyske
marinen fekk å gjera under heile krigen.
Underkommunisert
Mange av dei tyske soldatane var kanskje litt naive då dei kom, dei trudde ikkje motstanden frå folk skulle vera så sterk, seier Toska.
Korleis okkupantane såg på krigen, meiner han er underkommunisert i ettertid. Mange av dei grundige rapportane tyskarane laga, står i motstrid til kva som sto i avisene og kva dei brukte i propagandaen.
– I rapportane kan ein lesa både om demonstrasjonane i Bergen mot Jonas Lie og Vidkun Quisling, og kor misnøgd tyskarane var med det norske politiet sin innsats. Om maskingeværet som var tatt frå eit tysk sjøfly som naudlanda på Fonnes i Austrheim, og om miner i norske fiskebåtar, seier Toska.
Han fortel at det var meininga var å ha ein eigen tysk propagandaavdeling i Bergen. Den kom ikkje i stand frå starten av, fordi dei gjekk ned då skipet «Rio de Janeiro» vart torpedert utanfor Lillesand 8. april 1940.
Tømrar og student
Vegard Toska er 25 år gammal. Han jobbar med tømring og har nett byrja å studera historie på universitetet i Bergen.
– Kvifor er du så interessert i noko som hendte meir enn 50 år før du vart født?
– Interessa starta då eg gjekk på barneskulen. På garden viste far min meg vrengde aluminiumsrestar på bøen heime. Det var frå eit tysk fly som havarerte på Toska 1. februar 1943. Etter det har eg lese meg opp på lokal krigshistorie, sett filmar og samla på saker frå krigen, fortel han.
Toska har mellom anna funne ut at farfaren hans var aktiv med i kampen mot den tyske invasjonen. Sjølv fortalde farfaren ingenting frå krigen, men bilete og vernepliktsboka han har funne dokumenterer det.
– Kva reaksjonar har du fått? – Berre positive, det er til all lukke ikkje slik at folk trur eg sympatiserer med den tyske okkupasjonsmakta, sjølv om eg fortel frå deira ståstad.