Koronaen sender UiB ut på leigemarknaden
Universitetet i Bergen vil gje alle studentane undervising på campus til hausten, og leiger ekstra lokale for å få det til.
eystein.rossum@bt.no
Vårsemesteret vart avslutta med stengde auditorium og lesesalar for alle studentane ved UiB. Men når det nye studieåret byrjar til hausten, er målet at alle dei 18.500 studentane skal ha minst eitt undervisingsrom å gå til kvar einaste veke.
Medan NTNU i Trondheim tidleg gjekk ut og sa at studentane måtte bu seg på eit heildigitalt haustsemester, satsar UiB tungt på å tilby undervising i auditorium, på grupperom og i laboratoriesalar – kvar veke, til alle studentane.
– Slik det ser ut nå, trur vi at vi skal greie å tilby alle noko fysisk undervising på campus på vekebasis. Å ha eit skikkeleg studiemiljø er viktig, også for å få den undervisingskvaliteten vi ønskjer oss. Difor kjem vi til å bruke ekstra ressursar for å få til så mykje fysisk undervising som råd, seier viserektor Oddrun Samdal ved UiB.
12-timars undervisingsdag Eitt av grepa som blir tatt, er å leige ekstra undervisingslokale i Bergen sentrum. Smittevernkrava, med einmetersgrensa, gjer at kapasiteten i romma dei har blir sterkt redusert.
– Auditoriekapasiteten går ned med cirka 2/3, i andre undervisingsrom blir han grovt rekna halvert. Vi arbeider med å signere leigeavtaler for ekstra areal sentralt i Bergen, seier Samdal.
Ho seier dei blant anna har ute følarar mot Grieghallen.
Også lengda på arbeidsdagane blir utvida for studentar og dei som underviser.
– Undervisinga kjem til å gå frå kl. 8 om morgonen til kl. 20 på kvelden. Dette har vi fått tilslutning for hos dei tilsette. Det gjer at kapasiteten aukar med 50 prosent, samstundes som den obligatoriske undervisinga skal gå på dagtid som vanleg, seier Samdal.
Har spart ein del Universitetet veit enno ikkje kor stor ekstrarekninga vil bli.
– Vi har spart ein del på mindre reising, straum og reinhald nå som campus har vore stengt ned. Samtidig har vi hatt ein del ekstra utgifter, blant anna til stipendiatar som har fått ekstra tid til å fullføre graden sin. Det er for tidleg i året til å vite kva sluttsummen blir, seier Samdal.
Universitetet arbeider nå med å finne ut korleis fordelinga blir mellom digital undervising og fysisk undervising frå hausten av. Alle må rekne med at ein del av undervisinga kjem til å skje via skjermen.
– På ein del store emne kan det også bli slik at halvparten får følgje undervisinga i rommet, medan den andre halvparten er med digitalt. Så kan vi bytte på kven som er med kvar, seier Samdal.
Den største utfordringa knyter seg til dei studiane som nyttar seg av laboratoriesalar og spesialrom.
– Her er vi i større grad avhengig av fysisk undervising, så dette vil bli prioritert, seier Samdal.
Får ikkje ta rektor i handa Også på Norges Handelshøyskole (NHH) og ved Høgskulen på Vestlandet (HVL) har dei ambisjonar om at alle skal få noko undervising på campus.
– Den tradisjonelle immatrikuleringa, der alle dei nye studentane handhelsar på rektor og på prorektor for utdanning, blir lagt om. Men det blir velkomstveke for dei nye studentane, og vi håpar å tilby noko undervising for alle på campus så snart semesteret startar, seier Linda Nøstbakken, prorektor for utdanning.
All studentutveksling ved NHH er avlyst for haustsemesteret. Vanlegvis kjem 300 utanlandske studentar til handelshøgskulen kvart år. Ein del utanlandske masterstudentar som etter planen skulle reist til Bergen får tilbod om å gjennomføre første del av studiet via nettet.
– Men elles ønskjer vi gje så mykje undervising som smittevernreglane tillater på campus, særleg for dei nye, seier Nøstbakken.
NTNU har snudd
Ved Høgskulen på Vestland (HVL) vil dei også prioritere dei nye studentane.
– Vi planlegg for å få plass til halvparten av dei vi vanlegvis har rom til. Ingen skal trenge å berre vere nettstudentar. Alle skal få noko undervising på studiesta
FOTO: MARITA AAREKOL
den sin, seier prorektor for utdanning Bjørg Kristin Selvik ved HVL.
Også ved Norsk teknisk-naturvitenskapelige universitet (NTNU) i Trondheim har dei gått attende på dei første planane med å gjennomføre eit heildigitalt semester.
– Einmetersregelen gjer det utfordrande, og mykje blir digitalt til hausten. Men vi har 640 undervisingsrom i tre byar, og dei har vi tenkt å fylle med aktivitet, seier Berit Kjeldstad, prorektor for utdanning ved NTNU.
Ved Universitetet i Oslo blir det lagt opp til små forelesingar og anna undervising.
– I utgangspunktet planlegg vi undervising i grupper på ti til tjue personar. For dei store forelesingane blir det kanskje vanskeleg å møtest fysisk. Vi både håpar og trur at det blir mange studentar på campus, seier rektor Svein Stølen ved UiO.