Dette kan Trumps koronasmitte bety for presidentvalet
morten.myksvoll@bt.no.
Kommentator Morten Myksvoll følgjer presidentvalet i USA. Les fleire av hans kommentarar på
DONALD TRUMP HAR testa positivt for koronaviruset. Det betyr at han kan ha vore smitteberande då han møtte Joe Biden til debatt på tysdag.
Båe to er i risikogruppa grunna alder.
NO SKAL TRUMP i karantene i ti dagar, ifølgje seg sjølv. Den skal han gjennomføre i Det kvite hus, medan han er på jobb. Reglane tilseier at smitta personar skal i isolasjon.
Det kan få konsekvensar for den neste presidentdebatten, som skal gå like etter Trumps isolasjon skal vere over, 15. oktober.
Med 32 dagar igjen til valet, er det uklart korleis denne nyheita vil påverke veljarane.
VELJARANE ER OVERVELDANDE negative til Trumps handtering av koronaviruset. Men han har redusert gapet noko dei siste månadane.
Smitten kan sjølvsagt utløyse noko sympati for Trump. Om han forblir asymptomatisk, vil han truleg halde fram med å bagatellisere viruset.
TRUMP HAR GJENNOM heile koronapandemien tona ned faren, og han har gong på gong arrangert møter som bryt med råda for sosial distansering.
Alt som får media til å skrive om dei meir enn 200.000 amerikanarane som har døydd av koronaviruset til no, kan skade Trump.
DET ER UMOGELEG å vite om Trump har smitta andre.
Trump nektar nemleg media tilgang til besøksloggane i Det kvite hus.
Det kvite hus har derimot stadfesta at Trump sist møtte Amy Coney Barrett på laurdag.
Fram til ho vert testa, kan nyheita om Trumps smitte skape uvisse kring hennar nominasjon til Høgsterett.
BARRETT HAR MØTT fleire framståande senatorar den siste veka – og mange av dei er òg gamle nok til å vere i risikogruppa.
Ho skal truleg møte endå fleire senatorar før høyringa 12. oktober.
Blir høyringa utsett, er det ikkje gitt at republikanarane rekk å stadfeste henne før valdagen 3. november.
DEI KAN FRAMLEIS gjere det før Senatets sesjon er over 3. januar, men det vil sjåast på som illegitimt av mange dersom demokratane endar opp med fleirtal i det neste Senatet.