Hentar angrepsspelar frå Åsane
Kristoffer Stava (21) vert henta til Øygarden for å bidra i nedrykksstriden.
oystein.vik@bt.no Øygarden FK hentar Åsane-spelaren Kristoffer Stava på lån ut sesongen. 21-åringen har spelt 15 kampar, men ikkje scora for Åsane så langt i år. No skal angrepsspelaren bidra i nedrykkskampen Mons Ivar Mjelde og Øygarden står i.
– Målet er å vera i Øygarden og utvikla meg, og bidra til at dei bergar plassen i divisjonen, seier Stava.
Han ser no fram til tolv veldig spennande kampar der det står om å overleva i Obosligaen.
– Då sjansen til å spela for Øygarden dukka opp, synest eg det verka veldig spennande, seier åkrabuen.
Øygarden ligg nest sist i Obosligaen, men det er veldig kort veg oppover på tabellen. Det som trengst er sjølvsagt å vinna nokre kampar.
Åsane, derimot, er med i toppkampen. Stava fekk etter kvart mindre speletid i Åsane, og håpar no han skal få mykje tillit hos Mons Ivar Mjelde.
– Eg trur Øygarden har eit lag som er meir enn godt nok til å unngå nedrykk, seier Stava.
Øygarden har mista fleire viktige spelarar den siste månaden. Forsvarsspelaren Andreas van der Spa er seld til Sogndal.
Spissane som sto for dei fleste måla i klubben, Jan Martin Hoel Andersen og Peter Godly Michael, har forsvunne til høvesvis Kongsvinger og Sogndal.
Van der Spa er erstatta av Kevin Jablinski, som er kome inn frå Sandnes Ulf.
Med Stava på plass, er arbeidet med å styrkja laget offensivt kome eit steg vidare. Men Øygarden håpar framleis på å få inn ein spiss før overgangsvindauget lukkar måndag.
Om ikkje det går, har Øygarden Aune Heggebø i stallen. Den innleigde spissen frå Brann har scora seks mål.
I tillegg er Bjarte Haugsdal ein nøkkelspelar i klubben. Kapteinen kan nyttast som spiss om det trengst.