Tre Øygarden-spelarar vart lempa av flyet
På billetten stod det feil namn. Det gjekk ikkje flyselskapet med på.
Etter det tunge 3–0-tapet for Lillestrøm sist søndag, reiste Øygarden FK-spelarane til Gardermoen for å koma seg heim.
For Kevin Jablinski, Charles Ezeh og Charles Maduka Udeh gjekk ikkje det som planlagt.
Dei tre vart lempa av flyet. Årsak: Det sto feil namn på billetten.
– Det er dumt når slikt skjer, seier Kurt Fjeld, leiar for Øygarden FK sitt sportslege utval.
Det ligg i sakens natur at det kan koma endringar på billettar når fotballag skal ut på tur. Spelarar kan bli kjøpt, seld, skada, suspendert. Eller dei kan bli overraskande vraka eller tatt inn i til kamptroppen.
Derfor er billettane Øygarden FK kjøper kostnadsfrie å endra namn på.
– Men ein må gå i skranken og endra namn. Det er gratis å gjera det, men det må altså gjerast, seier Fjeld.
Så vart ikkje gjort.
Dei tre spelarane kom seg til slutt heim. Med neste fly.
Årsaka til at dette kunne skje, heng saman med at Øygarden reiser med færrast mogleg personar på bortekamp for å spara pengar.
– Det fall mellom to stolar kven som hadde ansvaret for å gjera endringa. Dette skjedde fordi me må vera veldig kostnadsbevisste, seier Fjeld.
Øygardens viktigaste kamp Jablinski var ein av dei tre som ikkje fekk koma med flyet. Han stadfestar hendinga, men har ikkje lyst til å kommentera den utover det.
– Eg vil berre ha fokus på kampen laurdag, seier Jablinski.
Kampen han snakkar om er heimeoppgjeret med Strømmen. Ein kamp som verkeleg fortener å verta kalla ein sekspoengskamp. Øygarden ligg på nedrykksplass, med Strømmen rett over seg på tabellen.
– Det er nok den viktigaste kampen vi har hatt, seier Jablinski.
Han kom nyleg på lån frå Sandnes Ulf, med mål om å få starta fleire kampar. Det har han gjort, som midtstoppar for ØFK. Jablinksi kjem frå Skien og er oppfostra i Odd-systemet.
– Når vi ligg der vi ligg på tabellen, så må vi ta situasjonen alvorleg. Denne klubben her skal ikkje rykkja ned, seier Jablinski.
Fordel med gras
Thor Kristian Økland er ein av veteranane i Nest-Sotra/Øygardensystemet. Visekapteinen er einig med Jablinski i at Strømmen-kampen er årets viktigaste.
– Vi må ha tre poeng. Det er eit press, men det presset lever vi godt med, seier Økland.
Han meiner Øygarden har ein god sjanse til å halda seg i 1. divisjon.
– No gjeld det berre at vi held fram med å vera solide på heimebane. Der har vi ein fordel med gras. Det kan bli avgjerande for oss, trur Økland.