Donald Trump vil så gjerne klistre Joe Biden til korrupsjon
Skuldingane mot Joe Biden ser ut til å vere falske.
Kommentator Morten Myksvoll følgjer presidentvalet i USA. Les fleire av hans kommentarar på bt.no/meninger
ONSDAG PUBLISERTE New York Post ei sak som sette fyr på amerikansk politikk. Saka påstår at Hunter Biden i 2015 inviterte ein ukrainsk forretningsmann til eit møte med Joe Biden – faren hans – som på det tidspunktet var USAs visepresident.
REPUBLIKANARANE HAR VORE svært oppteken av å kople Hunter Biden til korrupsjon i Ukraina.
Donald Trump og hans allierte har brukt skuldingane mot Biden til å distrahere veljarar frå Ukraina-skuldingane mot Trump – som førte til at demokratane sette i gang ein riksrettsprosess mot presidenten.
Problemet er New York Post-artikkelen ikkje er så truverdig.
KOMMENTAR
SAKA BASERER SEG på e-postar som skal stamme frå Hunter Bidens datamaskiner – som han ifølgje saka leverte til ein verkstad i Delaware i 2019.
Hunter Biden bur i Los Angeles, på motsett side av USA. Ifølgje saka, henta han aldri datamaskinene.
New York Post fekk e-postane frå Rudy Giuliani – som har vore sentral i Trumps handtering av Ukraina, inkludert forsøket på å skulde Hunter Biden for korrupsjon.
Torsdag vart det kjent at etterretninga åtvara Trump om at Russland fôra Giuliani med desinformasjon.
DEI MILDT SAGT uklare omstenda rundt artikkelen – og ein rettkomen mistanke om at skuldingane er konstruerte – gjorde at Twitter og Facebook stoppa spreiinga av New York Post-artikkelen.
Det er svært alvorleg at redaktørstyrte medium vert avgrensa slik.
Men det er òg alvorleg dersom dei vert brukt av politiske aktørar – inkludert Russland – til å spreie falsk informasjon.