Vurderer eigne koronareglar for Bergen gjennom heile vinteren
Byrådet vurderer å innføre strengare reglar for Bergen enn resten av landet gjennom heile vinteren.
– Vi må forvente ein tøff vinter, og vi må rekne med nye rundar med auka smitte fram til vi får vaksinert befolkninga, seier byrådsleiar Roger Valhammer. Derfor skal byrådet no vurdere ei eiga «vinterforskrift» for Bergen. Helsebyråd Beate Husa understrekar at smittetrykket vil vere avgjerande for kor streng ei forskrift som skal vare gjennom vinteren, vil bli.
Det fortalde byrådsleiar Roger Valhammer då han møtte koronautvalet i bystyret måndag.
– Byrådet må vurdere kva som er rett å gjere når forskrifta går ut på søndag (6. desember red.anm). Er det då grunnlag for å ha nasjonale reglar i Bergen frå 7. desember? Bør vi ha ein form for vinterforskrift, som tilseier at Bergen har strengare reglar enn landet elles gjennom vinteren? spurde byrådsleiaren i møtet.
– Må forvente ein tøff vinter Valhammer viste til at Bergen saman med Oslo er dei to byane med høgast risiko for utbrot, og fortalde at «vinterforskrifta» er eit av forslaga som no ligg på bordet.
– Vi må forvente ein tøff vinter, og vi må rekne med nye rundar med auka smitte fram til vi får vaksinert befolkninga.
Også helsebyråd Beate Husa nemnde at «tiltak gjennom vinteren» kan bli aktuelt på byrådets pressekonferanse måndag.
– Men at vi då forhåpentlegvis kan sleppe dei aller strengaste tiltaka. Frå byrådet si side vil det ikkje vere aktuelt, slik situasjonen ser ut no, å gå rett tilbake til den nasjonale forskrifta frå og med måndag, sa Husa.
Skal drøfte ideen
Ideen om ei «vinterforskrift» kjem frå Husas byrådsavdeling.
– Det er også blitt jobba litt med korleis ei slik forskrift til eksempel kunne sjå ut, fortel Husa.
Kommunen har fortalt til nasjonale styresmakter at dette er noko dei vurderer, men ideen er ikkje ferdig diskutert. FHI jobbar no med å utvide verktøykassa kommunane kan ta i bruk for å handtere viruset, den såkalla «tiltaksmenyen». Husa vil vente på dette arbeidet.
– Det blir viktig for Bergen å sjå til arbeidet FHI gjer. Dei sa verken ja eller nei til ideen, men viste til arbeidet dei heldt på med, seier Husa.
Mildare enn i dag
Ho understrekar at smittetrykket vil vere avgjerande for kor streng ei forskrift som skal vare gjennom vinteren, vil bli.
– I ein større by der det er meir trongbudd og større sjanse for utbreiing av smitte, så kan det vere føremålstenleg å ha ei vinterforskrift, men det er for tidleg å seie korleis den blir, seier Beate Husa.
Også korleis dei nasjonale reglane utviklar seg, samt framdrifta på vaksinering av sårbare grupper vil spele ei rolle.
– Det er eit ganske stort hopp ifrå den forskrifta som gjeld i Bergen i dag og den som gjeld nasjonalt. Det hoppet kan vere endå større når vi nærmar oss jul, så det kan hende vi må legge oss på ein mellomting, seier Husa.
– Kan du seie noko om kor lang tid ei slik forskrift kan vare?
– Det er veldig vanskeleg å seie noko konkret om det, men når vi kallar det ei vinterforskrift, så handlar det og om at dette er ein periode der veldig mange har luftvegsinfeksjonar. Så den må i alle fall vare i den perioden der det er mykje luftvegsinfeksjonar i befolkninga, seier helsebyråden.
– Eg trur dei bli lei
Eit anna alternativ byrådet ser på, er ein revidert versjon av dagens forskrift som blir forlenga i dei siste vekene fram mot jul. Dette for å hindre nye utbrot på halen av denne smittetoppen, sa byrådsleiar Valhammer måndag.
– Eg trur dei fleste er innforstått med at det no nærmar seg ei vaksine. Dei gler seg til det, men er og innstilt på at det vil vere tiltak i ein eller annan form fram til vi er i mål med vaksineringa, seier Husa.
– Så du trur bergensarane vil tole ei slik vinterforskrift?
– Eg trur dei bli lei. Eg er lei. Eg trur ikkje det er slik at folk gler seg over det, men trur og mange opplever at det er riktig.
Forskrifta som gjeld i dag har fått sterk motbør, mellom anna grunna regelen om at maks fem personar kan samlast i private heimar.
Vil konkludere denne veka Byrådet har planlagt å legge sin konklusjon på bordet før komande helg. Det vil også bli henta inn nye faglege innspel, ifølgje byrådsleiar Valhammer.
– Det er klart, det er for tidleg å seie heilt sikkert, så det er ikkje noko vi kan garantere, då dette og påverkast av utviklinga og trendane som blir synlege dei neste dagane, seier Valhammer.