Torsdag blei det ampert. Fredag var køen borte.
Bergen kommune har tatt grep etter køkaoset torsdag.
Gjennom heile veka har det vore lange køar til vaksinestasjonen på Sentralbadet. Det toppa seg torsdag då køen sto 300 meter frå inngangen.
Hundrevis av ungdommar frå Fana og Ytrebygda blei ventande i fleire timar. Då ein del fekk beskjed om å dra heim, blei stemninga amper.
Fleire kritiserte kommunen for dårleg organisering.
– Skremt vekk
Då BT er utanfor Sentralbadet i 17-tida fredag, er det ingen kø.
– Fekk du ikkje vaksine torsdag , kan du kome i dag (fredag) . Du går rett inn, seier vaksinesjef Hossein Tehrani nøgd.
Han trur nokon kan ha latt seg skremme av køane torsdag.
– Det er det ingen grunn til, understrekar han, og oppmodar fleire om å kome.
Før vaksinestasjonen opna fredag, var det ein del som hadde stilt seg i kø for å vere sikre på å få vaksinen.
Drop-in-tilbodet for ungdommar mellom 12 og 15 år varte frå klokka 14 til 18. Fredag ettermiddag var sett av til dei som bur i Bergenhus og Årstad bydel.
– Men det er ingen som kontrollerer kva bydel du kjem frå, seier Tehrani.
– Betyr det at Fana-ungdommar som ikkje fekk i går, kan kome til i dag?
– Ja, seier Tehrani.
Ekstra vaksinedag
Etter køkaoset torsdag har kommunen gjort fleire grep.
Laurdag er det ekstra drop-indag for 12–15-åringane i Sentralbadet frå klokka 09.30 til 15.30.
Det blir sett av 1200 dosar til denne dagen, opplyser prosjektleiar for vaksineringa, Elisabeth Engelsen, i ein e-post til BT.
– Erfaringane frå vaksineringa denne veka viser at mange i denne aldersgruppa ønskjer å ta imot vaksinen. Vi vel difor å legge til rette for ein ekstra vaksinedag i morgon (laurdag) , når det er skulefri for ungdommane, skriv Engelsen.
Ho minner om at det kan vere kø og ber folk vere tolmodige. Dersom køen blir for lang, kan
Men det er ingen som kontrollerer kva bydel du kjem frå. Hossein Tehrani, vaksinesjef
innbyggarane bli bedt om å kome tilbake i neste veke til bydelsvis drop-in.