Milliondryss for å rekruttere fastlegar
– Eg er kjempebekymra for fastlegeordninga. Meir no enn eg var for eit år sidan, seier Lena Kristin Welle-Nilsen ved Loddefjord legesenter.
Ho er tillitsvalgt for fastlegane i Bergen. Og arbeider på eit legekontor i krise, ifølgje ho sjølv.
Etter at ein kollega blei langtidssjuk, står dei 1200 pasientane igjen utan fastlege. Stillinga er lyst ut tre gongar, men ingen har søkt.
Dei gjenverande legane tek unna så godt dei kan.
– Eg jobbar kveldar, helgar og feriar. Det går ikkje så mykje lenger, seier Welle-Nilsen.
15 millionar kroner
Helsebyråd Beate Husa har møtt opp på legekontoret i Loddefjord. Med seg har ho lovnader om tiltakspakke for å betre rekrutteringa av fastlegar i Bergen.
I fjorårets bybudsjett blei det sett av fem millionar kroner for å styrke fastlegeordninga, med ein plan om å doble dette i år. I år legog ger byrådet ytterlegare fem millioner kroner i potten i nytt bybudsjett, altså totalt 15 millioner kroner.
– Dette er ein kraftig tiltakspakke som underbygger at Bergen kommune ser og forstår utfordringane i fastlegeordninga, og at vi vil gjere alt vi kan for å løyse dei, seier helsebyråden.
Fastlegen og byråden er enige om at det hastar å gjere noko med fastlegemangelen:
13 av byens 247 fastlegar 67 år eller eldre. Dersom dei sluttar utan at ny lege er på plass, vil 16.000 bergensarar stå utan fastlege.
Egen prosjektgruppe
Welle-Nilsen er med i prosjektgruppa som har fått i oppgåve å leggje ein plan for korleis midlane skal brukast. Målet er å rekruttere nye fastlegar, men også å behalde dei som er i yrket i dag.
– Prosjektgruppa legg fram arbeidet sitt i november, og vi skal verksette så fort bystyret har vedtatt finansieringa i budsjettet, seier Husa.
Byråden nevner etablering av vikarordningar, utdanningsstillingar for både næringsdrift og fastlønn og rettleiing av legar i spesialisering som aktuelle tiltak.
– Dette er veldig velkomment potten kjem godt med. Vi vil at det skal vere bærekraftig å vere fastlege, seier Welle-Nilsen.
Ho har mest tru på modellen der fastlegen er sin eigen sjef, men vil at det skal vere mogleg å velje fastlønn frå kommunen dei første åra. Dei som har lange pasientlister i dag må også kunne «slanke» listene sine slik at jobben blir overkommeleg, seier ho.
Tillitsvalgte for fastlegane arbeider også for at fastlegane som ynskjer det skal sleppe nattevakter på Bergen legevakt.
Krev nasjonale grep
I fjor innførte Bergen kommune ein utkjøpsgaranti for fastlegar, som skal gjere det mindre risikabelt å kjøpe fastlegeheimel i Bergen. Dersom ein angrer seg, kan ein få selge praksisen tilbake til kommunen.
Ifølgje Welle-Nilsen kan ting tyde på at dette tiltaket allereie har hatt ein viss effekt ved at talet på ledige heimlar er redusert frå 20 til 16.
Frå i haust kan legekontor søke tilskot for å utvide lokala sine, for å gjere plass til nye kollegaer som då får vere ein del av eit etablert team.