Droppar Kina til fordel for kortreist levering
Batterifabrikken på Midtun har så langt fått plastdelen med skip frå Kina. No blir det levering med truck frå naboen over gata.
Robotane i batterifabrikken Corvus på Midttun jobbar effektivt. Brett etter brett som er fylt med kvite plastdelar, blir mata inn i produksjonen. Bretta er laga hos Grønneviken i Bergen.
Plastdelane, som skal inn i eit framtidig batteri til eit skip, er så langt importert frå Kina.
Måndag signerte Corvus ein kontrakt med grannen Bergen Plastics på motsett side av vegen over Sandbrekketoppen. Og plasten er henta hem.
– Vi er svært glade for å kunna inngå ein langsiktig rammeavtale i millionklassen med vår næraste nabo, seier administrerande direktør i Corvus Energy, Fredrik Witte.
– Konkurrerer på pris
Fram til no er denne komponenten kjøpt frå Kina. Men då Corvus tok kontakt med plastfabrikken rett over vegen, viste det seg at dei, ifølgje Holberg, kunne konkurrera, både på pris og kvalitet.
Kortreist plast, hundre meter over asfalten på Midtun, gjer ein god del for klimaavtrykket på batteria. Men det gir også sikker levering.
Og det er ikkje små mengder som skal til. Når produksjonen går, trengst 120 delar i timen, 70 timar i veka. Rundt 30.000 i året.
Gammal bergensbedrift
Bergen Plastics vart etablert i 1947. Selskapet produserer 70 prosent for eksport. Dei 35 tilsette lagar delar til industrien og emballasje.
– Produksjon av delar til industrien er det vi har gjort lengst. Denne avtalen er med på å styrka grunnlaget for verksemda, seier direktør Jan Atle Ellingsen.
Han trur ikkje at avtalen med Corvus vil gi fleire tilsette i verksemda.
– Vi er alltid på utkikk etter alternative leverandørar, seier Geir Holberg, som er innkjøpsansvarleg hos Corvus.
Kjøper ti tusen om gangen
Dei to grannane har laga ein rammeavtale om pris og kvalitet. Så kjøper Corvus ti tusen i slengen.
– Vi har også ein fullautomatisert produksjon, seier Ellingsen i Bergen Plastics.
Holberg seier at Corvus har svært strenge kvalitetskrav med lite rom for avvik.
Selskapet har no laga støypeformer til delen som skal lagast for batterifabrikken.
– Vi har også klart å forbetra den. Den har to ulike plasttypar og kom tidlegare i to delar. Vi klarer å produsera den i ein del, seier Ellingssen.