\ ALEINE SAMAN
Når to kreative sjeler vel å slå seg saman om å – innimellom – danne eitt heile, blir resultatet Studio Each, som opna i Bergen i haust.
Stylistane Per Olav Sølvberg og Adrian Pedersen har opna ein ny møteplass
i Sandviken i Bergen, Studio Each.
Stylistane Per Olav Sølvberg og Adrian Pedersen – om du er ivrig leser av Bo Bedre, kjenner du dei frå Hjemme hos stylistene-serien vår – har nyleg flytta saman. Kreativt, vel å merke. Dei har funne seg eit studio i gata der dei begge bur i Sandviken i Bergen, og fylt det med det dei likar best. To helger i månaden, eller etter avtale, opnar dei dørene til Studio Each, og sel godbitane dei samlar på.
– Det er i hovudsak unikaprodukt frå ukjende og «up and coming»-designarar og kunsthandverkerar, seier dei to, og nemner mellom andre Poppy Lawman (som i august vann Årets nykommer i Bo Bedre Designpris), Anna Øfstedal Eng, Jannik Abel og svenske Paula Atelier. I tillegg fører dei møblar frå danske Frama og kledene til Aure, eit kultmerke drive av nordmenn i København.
– I utgangspunktet er dette arbeidsplassen vår, der vi sit og jobbar med kvar våre ting i vekedagane, men vi ynskjer å bruke romma til meir enn det. Vi vil skape ein møteplass, seier dei to, som helst ikkje vil kalle det ein butikk.
– Vi kjem til å bruke studioet til pop-up-utstillingar, middagar og lanseringar, og ha performance-kunst i vindaugskarmen. Den type ting, fortel duoen, og understreker:
– Dette er lidenskap, passion. Vi gjer ikkje dette for å bli rike. Vi gjer det fordi vi er oppriktig engasjert og ynskjer å løfte fram dei unge og ukjende – dei som er svoltne og ivrige på å kome seg opp og fram, men som ikkje har arenaen for det enno.
Dei trekk fram stylistkollega Kirsten Visdal og hennar prosjekt Håndverk+ i Vågå, der ho løfter fram talent i utstillingar og workshops.
– Kirsten har starta noko bra med å formidle talenta. Og så kan vi selje arbeida deira, seier dei. – Det blir ein fin sirkel.