Olav Mosdøl er 80 år
●● Olav Mosdøl, Kleivstaulvegen 2, 3850 Kviteseid er 80 år 10. februar.
Jubilanten er pensjonert skulemann, kåsør og forfattar. Han er fødd i Bykle, har utdanning med befalskule, lærarskule og er cand. mag. frå UIO med fagkrinsen norsk, kroppsøving og historie. I åra frå 1960– 99 hadde Mosdøl sitt arbeid i grunnskulen og den vidaregåande skulen som lærar, studieinspektør og rektor. Han var litt i Lillesand og Birkenes kommune, men dei fleste åra i den vidaregåande skulen på Kvitsund Gymnas. Han stod i 1973– 74 for utarbeiding av planar og søknad for gymnaset i Kviteseid, der han no bur og har vore aktiv politikar for KRF frå 2003 til 2015.
Olav Mosdøl debuterte som forfattar i 1977 med diktsamlinga «Kvite symrer». Gjennombrotet kom i 1979 med diktsamlinga «I Lydeskar». Han fekk forfattarstipend i 1999 og har seinare arbeidd med kultur og litteratur på heiltid i Telemark. I alt har han gjeve ut cirka 30 bøker og skrifter, som omfattar prosa, lyrikk og salmar, kantatar og skodespel, essays og artiklar. Frå 1990-åra har han hatt samarbeid med ei rekkje tonekunstnarar og komponistar.
Elles har Mosdøl fått ei rekkje prisar og stipend. Det gjeld: Diktkonkurransar i NRK Telemark og Ta/diktets Venner i Skien, Emmausprisen for diktsamlinga «Røter» i 2006, kulturprisar frå Bykle kommune og Kviteseid kommune, målprisen i Setesdal og Kviteseid målpris, Telemark fylkes kunstnarstipend og Nopa-stipend.
Jubilanten likar seg i natur og fjellterreng. Ei interesse han har saman med familien, som er kona Elise, tre vaksne barn og ni barnebarn. Dagen skal feirast todelt: i februar med dei næraste og i juni med ein større konsert og jonsokfest i Kviteseid.