Setesdalsprisen til Hasla AS
Grete Fossen og Ørnulf Hasla blei torsdag kveld heidra med den høgthengande Setesdalsprisen.
– Dei har skapt ei verksemd som er eit fyrtårn for heile Setesdal, heiter det i juryen si grunngjeving.
Grete Fossen og Ørnulf Hasla skipa Hasla i 1996, tidlegare heitte verksemda Setesdalsylv AS.
Ekteparet har hatt opplæringansvar for heile 61 lærlingar og har arbeidd langsiktig med rekrutteringa til sylvsmedfaget, som jo er ein av dei mest tradisjonsrike næringsvegane i Setesdal.
HEILE VERDA
Fra Hasla sine lokale i Valle blir det selt sylv og bunadsylv over heile verda. Om lag 40 prosent blir eksportert til utlandet, mellom anna til Epcotsenteret i Florida.
Hasla AS har også starta eit dotterutsal på Grünerløkka i Oslo, og her er det verkeleg snakk om dotterverksemd. Det er døtrene til Fossen og Hasla som driv butikken i hovudstaden.
Verksemda er kjend for å skape smykke basert på ein enkel og stilrein nordisk designfilosofi, men det vert også laga mykje tradisjonelt bunadsylv. Hasla AS omset for opp mot åtte millionar kroner i året.
Det er dei fire ordførarane i Setesdal som er jury for Setesdals- prisen. Dei seier at Hasla AS og ekteparet Grete Fossen og Ørnulf Hasla er blitt ein spydspiss i marknadsføringa av dalen, ikkje minst gjennom sosiale media.
Prisen blei delt ut under festmiddagen til Setesdalskonferansen på Revsnes Hotell på Byglandsfjord torsdag kveld.
TIDLEGARE VINNARAR:
Saave Nomeland (/Nomeland Anlegg AS), Hanna og Bjørn Erling Auestad (Bykle Hotell), Alf Tore Moen (Evjeklinikken), Per Birkeland (Byglandsfjord Sag), Terje Greibesland (Setesdal Bilruter), Kai Jeiskelid og Valle Sparebank.