God, fartsfylt thriller
KRIM
«Hvis helvetet var av is»
Bernard Minier. Omsett av Christina Revold Aschehoug
Yndlingshesten til ein mangemilliardær blir drepen, og hovudet hengt opp i ein betongkonstruksjon. Så blir ein farmasøyt funnen grovt mishandla, drepen og hengt opp under ei bru. På same tid begynner ein kvinneleg, ung psykolog å arbeide på ein institusjon for spesielt farlege kriminelle.
Når det så blir funne DNA frå ein av dei aller farlegaste pasientane på den avliva hesten, blir det slått full alarm. Det heile er lagt til førjulstid langt oppe i Pyreneane, og kriminalførstebetjent Servaz og medarbeidarane hans leitar lenge i blinde. Det blir ei sjølvmordsbølgje blant tenåringsjenter i distriktet mange år tidlegare som fører til at mysteriet blir løyst.
Det får greie seg om innhaldet i denne «krim-noir-boka», som forfattaren har utstyrt med eit innfløkt, men logisk plott. Den gjennomgåande stemninga gjennom dei vel 630 sidene, er dyster.
Bakteppet er mellom anna kulde og uver, skildra på ein måte som iblant får det til å gå kaldt nedover ryggen – i alle fall på meg. Yrsa Sigurdardottir var eit namn som rann meg i hug. Den islandske krim- og barnebokforfattaren likar å legge handlinga til stader med tåke, uver og ekstreme naturtilhøve.
«Hvis Helvete var av is» er, stort sett, kriminalteknisk godt handverk. Den franske forfattaren, Minier, greidde å lure meg gjennom nesten heile boka. Slutten var ei aha-oppleving. Slutten gav meg litt bakoversveis – fordi eg hadde lese dei første 100 sidene utan å oppdage at ganske mykje var på plass alt.
Eg skreiv at boka til Bernard Minier, stort sett, er bra krimhandverk. Men, eg har fleire atterhald. 630 sider er minst 100 til 200 for mykje – den grunnleggande intrigen krev ikkje så mange sider. Unødvendige oppattakingar irriterer meg som lesar.
Den viktigaste innvendinga er likevel at verken kriminalførstebetjent Servaz, eller dei andre, sentrale personane står heilt til truande – psykologisk. Minst ein laus tråd gjer at eg reknar med at det kjem minst ei bok til med dei sentrale personane i krimmen.