Finland vil ha tog til Estland og Kirkenes

Finland og Estland planlegg 92 km jernbanetunnel mellom Helsingfors og Tallinn, og vil også ha jernbane til Ishavet.

●●Over 370 000 køyrety og 8 millionar menneske kryssar Finskebukta kvart år. Den finske statsministeren Juha Sipilä snakka om planen under Nordisk råds sesjon i Helsingfors i november, og i februar blei heile prosjektet presentert. Dette blir den lengste jernbanetunnelen i verda.

Gotthardtunnelen i Sveits, tunnelen under Den engelske kanal og Seikantunnelen i Japan er mellom 50 og 60 km. Finland har mangeårig erfaring med 120 km tunnel for vassforsyning til Helsingforsområdet frå dei store innsjøane nord for Lahti.

Bak rapporten Finest Link Initiative står Finlands og Estlands regjeringar, hovudstadene Helsingfors og Tallinn og fylka rundt. Prognosane tyder på at den enorme investeringa vil bli tilbakebetalt på 40 år, utan offentleg støtte frå Finland og Estland. EU prioriterer samanbinding av regionar. Det er rekna med 40% tilskot frå EU, som for tunnelen Rødbyputtgarten, og at det framleis vil vere ein del ferjetrafikk både for passasjerar og gods. Helsingfors og Tallinn har eit stadig tettare samarbeid. Det økonomiske samarbeidet har vakse enormt sidan jernteppet fall. Ein jernbanetunnel under Finskebukta vil gi samanhengande effektiv togtrafikk til heile den store europeiske marknaden. Finest Link er arbeidstittelen, - det finaste sambandet. Samtidig foreslår kommunikasjonsminister Anne Berner (Finland) samarbeid med det norske jernbanedirektoratet for å lage ein plan for forlenging av jernbanen frå Rovaniemi til Kirkenes. Ishavsbanan er arbeidstittelen på dette prosjektet, der første planleggingsfasen starta sommaren 2017 i det finske Trafikverket. Strekninga Rovaniemi-kirkenes er 526 km i luftlinje. Mellom Rovaniemi og Lakselv er det 518 km. Det handlar om ein ny jernbane nesten like lang som Oslo-trondheim. I eit svar til stortingsrepresentant og Nordisk rådsmedlem Ingalill Olsen (Arbeidarpartiet, Finnmark) skriv kommunikasjonsminister Berner at Arktis blir stadig viktigare. Finlands regjering vil ha Norge med på ei storsatsing for å styrke naeringslivet i nord med tanke på turismen, gruveindustrien, framtidig bruk av Nordøstpassasjen, olje og gassleveransar, fiskerinaeringa og skogindustrien.