Furre driv også dobbeltspel

Ordførar Harald Furre gjekk nyleg hardt ut i Faedrelandsvennen og skulda samferdselsminister Ketil Solvik-olsen for dobbeltspel i forhandlingane om byutviklingsavtale for Kristiansand.

●●Furre meiner at Solvik-olsen stiller krav som inneber bompengar og nye bomstasjonar - samtidig som han påstår at regjeringa ikkje pålegg Kristiansand å krevje inn bompengar. Eg er samd med Furre i at dette er dobbeltkommunikasjon på linje med det som ser ut til å ha blitt ein gjennomgåande strategi for Frp. Men Furre og det politiske fleirtalet i Kristiansand drive også dobbeltspel om byutviklingsavtalen.

Furre prøver å gi inntrykk av at han vil å halde bompengane på eit moderat nivå. Men samtidig fører han og fleirtalet i bystyret ein utbyggingspolitikk som aukar biltrafikken, og som derfor fører til at Vegdirektoratet og regjeringa krev høgare bomtakstar. Fagfolk i kommunen og hos fylkesmannen har ofte åtvara om konsekvensane av den byspreiinga som Kristiansand kommune med Furre i spissen legg opp til. Dagens utbyggingspolitikk strir mot grunnlagsdokumentet for byutviklingstalen. Det vil vere vanskeleg å nå målet om nullvekst i bilbruk med dagens utbyggingspolitikk. Sjølv om vi får etablert eit godt kollektivtilbod, så vil det ikkje bli brukt i tilstrekkeleg grad.

På tross av åtvaringar i frå fagfolk og i frå opposisjonen i bystyret så har Furre tura fram med sin bilbaserte utbyggingspolitikk for å tekkast utbyggarane. Samtidig driv han forhandlingar med Vegdirektoratet om å få på plass ei byutviklingsavtale som skal redusere biltrafikken. Vi har fått lite informasjon om desse forhandlingane. Men på eit møte i Kristiansand i april i år sa vegdirektør Terje Moe Gustavsen at det som Kristiansand har presentert så langt, ikkje er godt nok. Det inneber i praksis ar dersom Kristiansand ikkje legg om utbyggingspolitikken og innfører andre trafikkreduserande tiltak, så kan det komme press om å auke bompengane ytterlegare. Kvifor har ikkje media i større grad følgt opp dette?

At Frp er både for og i mot ei sak, har etter kvart blitt så vanleg at media knapt kommenterer det. Men vi burde kanskje forvente at ein samferdselsminister er samd med seg sjølv og sine fagfolk.

Det blir lett amerikanske tilstandar om vi lar enkelte parti sleppe unna med systematisk dobbeltkommunikasjon når ei sak blir vanskeleg for eigne veljarar. Dersom samferdselsministeren meiner at vi kan nå måla i byutviklingsavtalen utan bompengar, så må vi kunne venta at han med sin stab kan gi nokre konkrete signal om korleis han tenkjer seg at det kan skje.

Furre har valt å samarbeide med Frp om ein miljøfiendtleg utbyggingspolitikk. Samtidig prøver han å få til ei miljøvennleg byutviklingsavtale i samarbeid med opposisjonen i bystyret og utan Frp.

Eg er redd for at det kan bli vanskeleg å ri desse to hestane samtidig utan å forskreve seg. Det uføre Furre på denne måten har brakt oss opp i, kan bli til stor skade for Kristiansand.