God dag Telenor – økseskaft!
Ein skulle tru at Telenor, med det ansvaret dei har for kommunikasjon i samfunnet vårt, var interessert i og lydhøre for dei utfordringar vi har når uveret er ute og fasttelefonen forsvinn, mobilnettet forsvinn, internettet er nede og naudnettet slit.
Istaden får vi inntrykk av at Telenor sitt hovedfokus er å unngå utgifter og fråskrive seg ansvar. Det er på høg tid at regjering og storting tek tak i kritisk infrastruktur og syter for at folk både har tilgang – og at ansvarlege aktørar blir pålagt å ta skikkeleg ansvar.
Med ujamne mellomrom har Agder blitt råka av uver. Kraftig snøfall, flaum, storm og dess like. Når slikt skjer kan ein i lokalsamfunna kome ut for det at ein er heilt utan vanlege kommunikasjonsmiddel, korkje fasttelefon, mobil, internett – ja endåtil naudnettet er nede. Tidlegare har innlandet vore verst råka, no sytte «Knud» for at kysten fekk unngjelde.
Dette er krevjande. Sikringsradioar, jaktradioar og satellitttelefonar syter for eit minimum av kommunikasjon mellom naudetatar og kriseleiing, hjelpetrengjande vert oppsøkt med bilpatruljar og brannvesenet mobilisert. Ein gjer det ein kan, og så håper ein då inderleg at ingen har behov for akutt hjelp utan å kunne seie i frå.
Ei utfordring er noko så grunnleggjande som naudstraum til basestasjonar som syter for at naudnett er oppe. I Bygland har vi fleire gonger opplevd å miste all kommunikasjon (mobilnett, internett, fasttelefonar og naudnett) ved straumbrot. Bare sikringsradioar og satelittelefonar fungerte. Dette er både tungvindt og fører med seg risiko for liv og helse.
Slik kan vi ikkje ha det, og med utgangspunkt i at kommunen både har straumaggregat og flinke folk, kontakta vi Telenor for å høyre om ein ikkje kunne gjere ei avtale, slik at ein kunne få kobla straum til basestasjonen når det kneip. Svaret som kom frå Telenor var at dei ikkje kunne svare og at: «Ved feil som ansees av kommunen som kritiske, så bør dette tas opp med beredskapssjef hos Fylkesmannen, så dette igjen kan vurderes ut ifra fylkets ønske om prioriteringer.» Dette etter at utfordringa var tatt opp både med fylkesmann, DSB og Telenor.
Bygland hadde ein liknande passiar med Telenor førre gongen dette hende. Og Telenor svara med eit skriv som hadde følgjande avslutning: «Ved feil som ansees av kommunen som kritiske, så bør dette tas opp med beredskapssjef hos Fylkesmannen, så dette igjen kan vurderes ut ifra fylkets ønske om prioriteringer.»
Slike «goddag mann, økseskaft» svar er mildt sagt ikkje godt nok. Er det for mykje å forlange at Telenor høyrer etter og er samarbeidsviljuge når kommunar vil sikre straum til basestasjonane deira?
Regjeringa har i svaert liten grad vist ansvar for kritisk infrastruktur. Stortinget må no ta grep og påleggje regjeringa å syte for at det snarast, som eit minimum, blir sytt for at naudnettet ikkje fell ut ved langvarige straumbrot.
Og så må stortinget syte for at Telenor mister sitt grep over kritisk infrastruktur i Norge. Dette må bli eit statleg ansvar.
Er det for mykje å forlange at Telenor høyrer etter og er samarbeidsviljuge når kommunar vil sikre straum til basestasjonane deira?