Historia om Fjotlandsruta

Jan Helge Fladmark har skrevet historia om Fjotlandsruta. Artiklene stod for første gang på trykk i Kvinesdal Historielags årsskrift for 2017 og 2018. Vi har delt den opp i fire.

Grunnlaget for denne historia er samtalar med fem personar som alle hadde ei naer tilknyting til Olav P. Netland og Fjotlandsruta: Bjørn Olav Hansen: Nevø til Olav, Judith Gjemlestad og Kari Edvardsen, døtrer til sjåfør Samuel S. Åmot på Fjotlandsruta. Jakob B. Eiesland og Tron Mygland: To fjotlendingar som begge kjende Olav godt og brukte Fjotlands ruta som kommunikasjonsmiddel då ho tok over etter hesten. Det var tida før personbilen blei allemannseige.

Personalia: Olav Pederson Netland blei født på Netland i Fjotland 30. 04. 1902. Foreldre var Sigrid og Peder Johan Netland. I 1933 gifta han seg med Marie Hansen, født 13.10.1907. Foreldre var Tomine og Lars Hansen. Dei var barnlause.

Innleiing

Då Olav Pederson Netland gifta seg med Marie Hansen blei han svoger til drosjesjåfør Harald Hansen. Dei to svograne fekk eit naert samarbeid. I 1945 fekk Ruth og Harald Hansen sonen Bjørn Olav, og han fekk Olav til onkel. Mellom Bjørn Olav og Olav blei det knyta tette band som varte ut heile levetida til Olav.

Her er kva Bjørn Olav fortalde meg:

Vegnettet i Fjotland

Den fyrste vegbygginga gjekk føre seg frå om lag 1880 fram til 1900-talet. I 1906 hadde vegen kome heilt opp til Netland. Før det var det bare ein kjerreveg, noko anna var det ikkje, men dei køyrde likevel med bilar på vegen før han blei utvida. Fram til Knaben kom det ikkje ordentleg veg før i 1940. Før det var det bare ein kjerreveg som laste- og personbilar kom seg fram på. Frå 1940 kunne du køyra med buss til Knaben.