Unge filmstjerner frå Randaberg inntok Berlin
BERLIN: Sina Håland og Sivert Goa hadde aldri trudd dei skulle hamna på den raude løparen på Berlinalen. Det gjorde heller ikkje Liss-Anett Steinskog då ho laga debutantfilmen «Hvalagapet».
– Er det stas å vera filmstjerner i Berlin?
– Ja, det er skikkeleg kult, svarer Sivert Goa frå Randaberg.
Tysdag morgon hadde «Hvalagapet» premiere på filmfestivalen i Berlin. Kortfilmen er plukka ut til Generation-seksjonen på Berlinalen, til det Norsk filminstitutt karakteriserer som ein av verdas viktigaste barnefilmfestivalar.
Ikkje verst for ein debutantfilm frå Randaberg, med unge skodespelardebutantar - som plutseleg opplever å bli henta på hotellet i Audi-limousin og bli oppvarta som forrektige filmstjerner.
– Me hadde fått beskjed om at Berlin-festivalen var litt low key, og hadde ikkje heilt sett for oss dette, seier co-produsent Siw Angell-Olsen på veg inn i VIPloungen.
– Me visste ikkje heilt kor me skulle leggja oss sånn stilmessig, seier regissør Steinskog.
Ny kjole
Men sidan koffertane framleis ikkje har kome fram, måtte delegasjonen frå Randaberg handla kjapt då dei kom til den tyske hovudstaden.
– Me måtte ut og kjøpa ny kjole i går, seier Sina Håland, som spelar den unge jenta Rikke, som i «Hvalagapet» har eit godt auge til Dani (Goa), men ikkje veit heilt korleis ho skal få sagt det til han.
Så nå er det ein velkledd og glad gjeng som er på veg inn i Zoo Palast, etter obligatorisk fotografering på den raude løparen.
Eksklusivt selskap
– Det hadde vore litt rart om eg tenkte at filmen skulle hamna her då eg laga han. For det skjer jo med dei faerraste, seier Steinskog. Ho har filmutdanninga si frå Nordland kunst- og filmfagskole, og har altså kome gjennom eit nålauge som er saers trongt.
– Kolossalt mange kortfilmar prøver å koma med her, nokre ganske få klarer det, seier Lars Skorpen, som er filmkonsulent i Filmkraft Rogaland. Filmkraft har støtta filmen økonomisk.
– Kvifor har akkurat «Hvalagapet» blitt plukka ut til Berlinalen?
– Eg trur det er ein veldig velkjent tematikk, som er lett å kjenna seg igjen i - men så er det gjort på vår eigen måte, seier Steinskog.
– Eg trur det har å gjera med at det er ein veldig klassisk film. Her er ingen mobiltelefonar eller appar. Han kunne blitt vist for ti år sidan og om ti år. Og så er det veldig søte og flinke skodespelarar, seier Angell-Olsen.
Verken Håland eller Goa hadde vore med på film før, då dei blei plukka ut etter open audition i Randaberg for halvtanna år sidan. Men det har gitt meirsmak, og Håland er allereie casta til ein ny kortfilm.
Ut i verda
«Hvalagapet» er sendt til Berlin av Norsk filminstitutt, som hadde tru på filmen. Under filmfestivalen vil representantar frå filminstituttet jobba opp mot agentar for å prøva å selja filmen inn til andre filmfestivalar i utlandet. Produsent Gunhild Oddsen skal møta norske festivalar, i tillegg til å prøva å få distribusjon til tv-kanalar.
Også Sigve Endresen, som var filmkonsulenten som innstilte «Hvalagapet» til støtte i Filmkraft, er på premieren. Han karakteriserer «Hvalagapet» som ei klassisk historie om det første kysset.
– Det var eit søt historie og eit godt manus. Men så har det også blitt ein fin film, seier Endresen.
Han kan ikkje hugsa at nokon Filmkraft-film tidlegare har kome til Berlinalen.
– Men så har folk i Rogaland også blitt meir ambisiøse etter kvart, seier Endresen, og legg smilande til:
– Nå tenkjer ein ikkje bare Stavanger eller Oslo, men verda.