Sandnes kan få to nye kvinnelege sokneprestar
SANDNES: Stavanger bispedømmeråd vil ha Kristina Grundetjern i jobben som sokneprest i Gand og
Lina Håland som sokneprest i Sandnes.
Kristina Grundetjern (41) har fått tilbod om jobben som sokneprest i Gand sokn i Sandnes. Fire menn og to kvinner søkte på stillinga.
Grundetjern jobbar i dag som ungdomsprest i Vennesla. Ho seier til Aftenbladet at ho ønsker å vente med å kommentere saka til ho har bestemt seg for om ho takkar ja til jobben. Ho har åtte dagar på å bestemme seg.
Erstattar Günter Theiss Jobben som sokneprest i Gand er det Günter Theiss som har hatt. Presten vakte oppsikt då han i fjor sommar stod fram i Aftenbladet og fortalte at han hadde skifta syn i saka om vigsel av homofile par. Året før hadde han fortalt menigheita at han meinte det teologisk sett ikkje var opning for likekjønna ekteskap, men no ville han likevel vie homofile.
I januar blei det kjent at Theiss sluttar i Gand for å bli byprest i Sandnes. Han overtar etter Rune Skøyen som går av etter over 15 år som prest i gatebildet i Sandnes.
Fire tilsettingar
Stavanger bispedømmeråd behandla denne veka fire saker om tilsettingar av sokneprestar.
Lina Håland (34) frå Sandnes har fått tilbod om jobben som sokneprest i Sandnes menighet. Tre menn og to kvinner søkte på stillinga. Håland jobbar i dag som sokneprest i Uskedal sokn i Hordaland.
Svein Nybø har fått tilbod som vikar for soknepresten i Randaberg.
I tillegg har bispedømmerådet vedtatt kven dei ønsker i stillinga som sokneprest i sokna Skjold, Vikebygd og Vats, men dette blir ikkje offentleggjort før fredag, ifølgje stiftsdirektør Jorunn Kraft Vistnes.