Brannvesenet fryktar skogbrann
ROGALAND: Skogbrannfaren er like høg her som på Austlandet, meiner brannvesenet. Der har det vore fleire brannar siste veka.
Brannvesenet åtvara onsdag om stor skogbrannfare. Dei ba folk vere ekstra forsiktige, også når ein grillar heime i hagen. Situasjonen har på ingen måte blitt betre.
– Skogbrannfaren er høg og den er aukande. No har det vore skogbrannar dagleg, fleire på Austlandet og laurdag i Bergen, seier Ståle Fjellberg i Rogaland Brann og Redning IKS.
– Korleis er status her, samanlikna med desse stadene?
–Situasjonen er tilsvarande, sjølv om det er høgare temperatur på Austlandet. Jorda er så tørr no at det lett tar fyr, og med vinden som er no, kan det bli farleg. Det må betydelege mengder regn til no for at faren blir mindre.
I starten av juni var grillforbod ein stor snakkis i fylket. – Dette er ikkje noko vi vurderer akkurat no. Vi er mest bekymra for skogbrannar, og i skogen er det allereie totalforbod, seier han.
Brannvesenet har 12 helikopter i beredskap over heile landet, og to av desse er i Rogaland; eitt i Sauda og eitt i Stavanger. Ifølgje NRK har det vore fleire skogbrannar hittil i år enn det var i heile 2017. Til no i år har det vore 319 brannar.
Lite nedbør
Det unormale vêret verkar ikkje å ha nokon ende. Ifølgje Meteorologisk institutt er det lite som tyder på betydelege mengder nedbør.
–Mandag er det venta noko nedbør, men det er snakk om veldig små mengder. Det kan kome nokre dråpar, men det er ikkje nok til at det hjelp på tørka. Elles ser det ut til at det kanskje kan kome litt nedbør på torsdag, men også dette er veldig små mengder, seier meteorolog Anne Solveig Andersen.
– Det er viktig å hugse at skogbrannfaren gjeld heilt til vi får nedbørsmengder av betydning. Det er ingenting i prognosane våre som tyder på at vi får dette med det første, seier ho.
Statistikk frå Meteorologisk institutt viser at det knapt har vore regn i Rogaland sidan 22. juni. Ifølgje NRK synk grunnvasstanden kvar dag med fleire centimeter fleire stader i landet. Aldri før har nivået vore så lågt i begynnelsen av juli, ifølgje Norges vass- og energidirektorat (NVE). Sist Norge hadde ei verre tørke var i 1947.
Vatningsforbod?
12. juni skreiv Aftenbladet at IVAR vurderte å innføre vatningsforbod. Ei lita periode med regn gjorde at dei slapp dette, men no utelukkar dei ikkje at det kan bli aktuelt.
– Vi følger situasjonen fortløpande og skal ha eit møte om saka no til veka. Det er ikkje meldt nedbør dei neste ti dagane, og dette ser vi som bekymringsfullt, seier Kjell Olav Gjerstad.