Helsekøane er for lange, bruk private meir
HELSEVESENET: Eg har ikkje råd til 60.000 kroner for en ryggoperasjon, og ventetida i Helse Stavanger på eit halvt år er for lang.
Frå april i år har eg hatt sterke smerter når eg går. Røntgenbileta viser at eg har innsnevra ryggkanal (spinal stenose). Fastlegen sende 6.7.18 tilvising til Helse Stavanger om spesialistbehandling.
Eg fekk svar frå ortopedisk poliklinikk i Stavanger om at eg hadde fått time 30.11.18. Dette var lenge å venta. Eg så på nettet at ventetida på Haukeland i Bergen var betydeleg kortare enn i Stavanger, og fastlegen søkte om plass i Bergen.
Svaret var at det var like lang ventetid i Bergen som i Stavanger.
I eit av verdas rikaste land
Legen skreiv òg at eg kunne få operasjonen privat. Denne ville kosta 60.000 kroner, utan noka offentleg støtte.Slik privat behandling har eg ikkje råd til.
Her må helsevesenet utvida behandlingskapasitet eller yta bidrag til privat behandling. Her går pasientar med smerter og ubehag i eit av verdas rikaste land, men får ikkje behandling.
Er det ikkje på tide å samarbeida meir med private klinikkar for å få helsekøene ned?
Meir venting
Elles fekk eg i november brev frå ortopedisk poliklinikk i Stavanger om at timen er utsett til 11.1.19.