Hildegunn Sagvaag blir professor i rusproblematikk

Hildegunn Sagvaag, bildet, er tildelt personleg opprykk til professor i rusproblematikk ved Det helsevitskapelege fakultet ved Universitetet i Stavanger. Sagvaag sin forskingsprofil er tredelt; Rusproblematikk som kunnskapsfelt, rusproblematikk som folkehelse og rusproblematikk som tema innanfor arbeidsliv. Ved utvikling av kunnskapsfeltet i rusproblematikk fokuserer Sagvaag på ulike kjelder til kunnskap; brukarerfaring, praksiserfaring og vitskapeleg erfaring. For å posisjonera ulike erfaringar er Sagvaag oppteken av datainnsamling som metode og den vitskapelege statusen av ulike ontologiske og epistemologiske posisjonar. Ho har medverka til utvikling av metode for å få tak i erfaringskunnskapen både frå dei som er involverte i rusproblematikk for eigen del, involverte som pårørande, eller som praktikarar i velferdsstaten.

I rusproblematikk som folkehelse tar Sagvaag utgangspunkt i ein tverrfagleg definisjon av folkehelse og legg vekt på den einskilde sin alkoholbruk både i relasjon til andre innanfor fellesskap, og i relasjon til overordna system.

Rusproblematikk i relasjon til arbeid har vore ein del av Sagvaag si forsking frå doktorgradsavhandlinga i folkehelse med alkoholbruk i tilknyting til arbeid, til deltaking i WIRUS (Workplace Interventions preventing Risky use of alcohol and sick leave) – prosjektet der Sagvaag leiar ein kulturstudie. Innanfor arbeidslivsfeltet har Sagvaag saman med kollega også redigert ein vitskapeleg antologi; Alkohol + arbeidsliv = sant? Sagvaag har leia og delteke i nasjonale og internasjonale forskingsprosjekt. Ho rettleiar både doktorgradsog mastergrads kandidatar og er studieprogramleiar for Master i rus og psykisk helsearbeid og etablerer i desse dagar eit offentleg doktorgradsprosjekt.

Internasjonalt forskingssamarbeid har resultert i studieopphald ved Kings College i London og ved Tranzo Tillburg universitet i Nederland. Dessutan deltek Sagvaag på internasjonale forskingskonferansar og gjer fagfellevurderingar både for nasjonale og internasjonale tidsskrift.