Uvanlig sauefødsel i Dirdal
DIRDAL: – Eg har full kontroll på paringa. Dette liknar helst på jomfrufødsel, seier sauebonde Dag Øvstebø.
Ragnhild Sofie Selstø
Det må ha skjedd i august.
Sauen Smilå, oppkalla etter spionen George Smiley i John le Carres krimromanar, gjekk på beite med to lam som framleis patta - det vil seie at dei framleis drakk mjølk frå mora. Det var berre damer på beite. Ingen potensielle fedrar i sikte.
– Eg har full kontroll på paringa, fortel Øvstebø.
Likevel, ettermiddagen den 29. januar oppdaga sauebonde Øvstebø noko svart, lite på rista Smilå sin bås. Eitt sort får, med morkaka rundt halsen.
– Eg var rask med å fjerne morkaka, og fekk flytta både Smilå og lammet vekk frå dei andre sauene, seier han. – Ikkje lenge etter kom eit nytt lam krypande fram under fôrbrettet til mora. To flotte lam. Såpass kraftige at eg valde å kalle dei Erna og Olaug.
Øvstebø var ikkje heilt uforberedt på fødselen. I november såg han at Smilå ikkje løp som vanleg. Og etterkvart såg han at ho vart tjukk på magen og fekk jur.
– Det er veldig sjeldan at ein sau er parringsvillig når ho har lam som pattar. Dette liknar helst på jomfrufødsel, seier sauebonden.
Lemming, altså sauefødsel, skjer vanlegvis i april og mai. Øvstebø har 45 – no 44 sauer som skal ha lam i april, og i likskap med Smilå har dei andre sauene fått namn.