– Veldig vemodig
SOLA: Hotelldirektøren hadde i oppgåve å finna nye eigarar. Då dei var på plass, mista han jobben.
Ved årsskiftet overtok Glastad-familien frå Farsund eigarskapet av Sola Strand Hotel.
– Då dei overtok, fekk eg beskjed om at dei ønskte ein ny direktør. Det var veldig vemodig. Men den nye eigaren ønskte å starta med blanke ark, seier Cornelius Middelthon som i går hadde sin siste arbeidsdag som hotelldirektør på strandhotellet.
Denne jobben har han hatt i fem og eit halvt år. Han er no fritatt frå arbeidsplikt fram til oppseiingstida er over.
– Hotellet er stengt no, og dei fleste tilsette er permitterte. Derfor blei det ikkje mogleg å ta farvel på ein skikkeleg måte, seier Middelthon, som foreløpig ikkje har ein ny jobb å gå til.
– Det er berre å ringa om nokon har gode forslag.
Hotellet var tidlegare eigd av Ellen & Axel Lunds stiftelse som var i ein vanskeleg økonomisk situasjon. I 2019 skreiv styret at resultatet hadde vore negativt i fem av dei åtte siste åra, og at stiftinga hadde likviditetsutfordringar.
– Ei av oppgåvene mine har vore å få til eit sal. Det er litt paradoksalt at eg ikkje får vera med vidare sjølv. Men for hotellet var det veldig bra å få nye eigarar. Ein får berre gleda seg over at ein kan koma tilbake som gjest, seier Middelthon.
Då han blei direktør, var det krevjande tider for hotellet.
– Det var ein veldig oljeknekk, og inntektene raste. Samtidig kom det inn fem store, nye hotell i regionen. Me måtte finna på eitt eller anna. Me satsa på å skapa nye opplevingar for gjestane, seier han og listar opp ulike konsertar og temakveldar dei har hatt.
– Ein flott person
Hotellet er no ein del av Team Hotels, saman med blant anna Hotel Victoria i Stavanger.
– I samanheng med kjøpet endrar me leiar for å få inn nye tankar. Det har ikkje direkte noko med Cornelius å gjera. Han er ein flott person, seier styreleiar Terje Ropstad.
Renoverar
Dei nye eigarane er allereie i gang med å renovera delar av hotellet.
– Me endrar blant anna litt på nokon av lokala for å tilpassa oss langhelg-segmentet. Me vil også veksa innan kurs og konferanse.
I tillegg til nokon av fellesareala er dei også i gang med dei eldste romma.
– Me tar ein del av tinga som bråkar no som hotellet er stengt, og så tar me litt og litt etter kvart. Eg har ikkje oversikt over kva det kjem til å kosta endå, seier Ropstad.
Å overta eit hotell når landet er ramma av korona-restriksjonar er ingen drøymestart.
– Når restriksjonane lettar, trur me nordmenn veldig gjerne vil reisa innanlands, og då er hotellet attraktivt. Men det blir ein mørk vinter.